Punjab Polls: సోనూసూద్‌ సోదరికి టికెట్‌.. కాంగ్రెస్‌కు ఆ ఎమ్మెల్యే షాక్‌!

చండీగఢ్‌: మరికొన్ని వారాల్లో అసెంబ్లీ ఎన్నికలు జరగనున్న వేళ పంజాబ్‌లో ఆసక్తికర రాజకీయ పరిణామాలు చోటుచేసుకుంటున్నాయి. ఇటీవల కాంగ్రెస్‌లో చేరిన సినీ నటుడు సోనూసూద్‌ సోదరి మాళవిక సూద్‌ను మోగ అసెంబ్లీ స్థానం నుంచి బరిలో దించడం పట్ల ఆ పార్టీ సిట్టింగ్‌ ఎమ్మెల్యే డా.హర్‌జోత్‌ కమల్‌ తీవ్ర అసంతృప్తి వ్యక్తం చేశారు. ఆమె కోసం మోగ స్థానం నుంచి తప్పుకొన్న ఆయన.. తాజాగా కాంగ్రెస్‌కు షాక్‌ ఇచ్చారు. ‘హస్తం’ పార్టీకి గుడ్‌బై చెప్పి భాజపాలో గూటికి చేరారు. చండీగఢ్‌లోని భాజపా కార్యాలయానికి వెళ్లిన హర్‌జోత్‌ కమల్‌.. కేంద్రమంత్రి గజేంద్రసింగ్ షెకావత్‌, మీనాక్షి లేఖి సహా పలువురు భాజపా కీలక నేతల సమక్షంలో కాషాయ దళంలోకి చేరడం గమనార్హం. ఇటీవల మాళవిక సూద్‌ కాంగ్రెస్‌లో చేరిన సందర్భంలో ఏర్పాటు చేసిన సభకు కూడా హర్‌జోత్‌ హాజరుకాలేదు. ఆయన గైర్హాజరుపై పీసీసీ చీఫ్‌ నవ్‌జ్యోత్‌ సింగ్‌ సిద్ధూ స్పందిస్తూ.. హర్‌జోత్‌ తనకు వ్యక్తిగతమైన స్నేహితుడిగా పేర్కొన్నారు. పంజాబ్‌లో ఫిబ్రవరి 14న ఎన్నికలు జరగనుండగా.. ఈరోజు 86మంది అభ్యర్థుల పేర్లతో కాంగ్రెస్‌ తొలి జాబితాను విడుదల చేసిన విషయం తెలిసిందే.