Rahul Gandhi: నేను చెప్పింది మోదీ అంగీకరించారు: రాహుల్‌ గాంధీ

హైదరాబాద్‌: ఇందూరు గిరిరాజ్‌ కళాశాలలో ఏర్పాటు చేసిన భాజపా జనగర్జన సభలో ప్రధాని మోదీ(PM Modi) చేసిన ప్రసంగంపై కాంగ్రెస్‌(Congress) అగ్రనేత రాహల్‌ గాంధీ(Rahul Gandhi) స్పందించారు. నిజామాబాద్‌(Nizamabad) సభతో తాను గతంలో చెప్పింది ప్రధాని మోదీ అంగీకరించినట్లు అయిందన్నారు. భారాస-భాజపా భాగస్వామ్యం తెలంగాణను నాశనం చేసిందని విమర్శించారు. వచ్చే ఎన్నికల్లో రెండు పార్టీలను కాదని కాంగ్రెస్‌ ఇచ్చిన 6 హామీలతో కాంగ్రెస్‌ పార్టీ అధికారంలోకి వస్తుందన్నారు. ఈ మేరకు ఆయన ఎక్స్‌(ట్విటర్‌)లో పోస్టు చేశారు. 

‘‘నేను చెప్పింది నిజామాబాద్‌ సభలో మోదీ అంగీకరించారు. భారాస అంటే భాజపా రిష్తేదార్‌ సమితి. భారాస - భాజపా భాగస్వామ్యం పదేళ్లలో తెలంగాణను నాశనం చేసింది. తెలంగాణ ప్రజలు భారాస - భాజపాను గమనిస్తున్నారు. ప్రజలు తెలివైనవారు. తెలంగాణలో రెండు పార్టీలను ప్రజలు తిరస్కరిస్తారు. వచ్చే ఎన్నికల తర్వాత 6 హామీలతో కాంగ్రెస్‌ ప్రభుత్వాన్ని ఏర్పరుస్తుంది’’ అని రాహల్‌ గాంధీ సోషల్‌ మీడియా వేదికగా పేర్కొన్నారు.