రాహుల్‌ గాంధీ యూకే ట్రిప్‌ వివాదం.. ప్రభుత్వం నుంచి నో క్లియరెన్స్..?

దిల్లీ: కాంగ్రెస్‌ నేత రాహుల్‌ గాంధీ బ్రిటన్‌ పర్యటనపై తాజాగా వివాదం చెలరేగుతోంది. లండన్‌కు బయలుదేరే ముందు భారత్‌ ప్రభుత్వం నుంచి ఆయన ‘పొలిటికల్‌ క్లియరెన్స్‌’ తీసుకోలేదని ప్రభుత్వ వర్గాలు పేర్కొంటున్నాయి. విదేశాల్లో పర్యటన చేసే క్రమంలో ప్రతి పార్లమెంట్‌ సభ్యుడు తప్పనిసరిగా ప్రభుత్వం నుంచి క్లియరెన్స్‌ తీసుకోవాల్సి ఉన్నప్పటికీ రాహుల్‌ గాంధీ మాత్రం అది పొందలేదని చెబుతున్నాయి. దీనిపై స్పందించిన కాంగ్రెస్‌.. ప్రైవేటు కార్యక్రమాలకు ఆ అవసరం లేదని వాదిస్తోంది.

‘ పార్లమెంట్‌ సభ్యుడు ఎవరైనా ఏదైనా విదేశీ పర్యటన చేసే సమయంలో భారత విదేశీ వ్యవహారాలశాఖ నుంచి పొలిటికల్‌ క్లియరెన్స్‌ తీసుకోవాల్సి ఉంటుంది. విదేశాల నుంచి ఎంపీలకు వచ్చే ఆహ్వానం కూడా భారత విదేశాంగశాఖ ద్వారానే రావాలి. విదేశీ కార్యక్రమాల్లో పాల్గొనాలనుకునే వారు అందుకు సంబంధించిన వివరాలతో మూడు వారాల ముందే విదేశాంగశాఖ వెబ్‌సైట్‌లో దరఖాస్తు చేసుకోవాలి. కానీ, రాహుల్‌ గాంధీ మాత్రం అలా చేయలేదు.’ అని ప్రభుత్వ వర్గాలు పేర్కొన్నాయి. కొన్ని సందర్భాల్లో ఆహ్వానం నేరుగా అందినట్లయితే.. ఆ విషయాన్ని విదేశాంగ మంత్రిత్వశాఖకు తెలియజేసి పొలిటికల్‌ క్లియరెన్స్‌ పొందాలని చెబుతున్నాయి.

విదేశాల్లో ఉన్న రాహుల్‌ గాంధీ పొలిటికల్‌ క్లియరెన్స్‌ తీసుకోలేదని మీడియాలో వచ్చిన కథనాలపై స్పందించిన కాంగ్రెస్‌ పార్టీ.. పార్లమెంట్‌ సభ్యులకు అటువంటి క్లియరెన్స్‌ అవసరం లేదని పేర్కొంది. ‘అధికారిక బృందం ఐతే తప్ప ప్రధాని నుంచి గానీ, ప్రభుత్వం నుంచి గానీ ఎంపీలు పొలిటికల్‌ క్లియరెన్స్‌ తీసుకోవాల్సిన అవసరం లేదు. టీవీ ఛానళ్లకు పీఎంఓ చేసిన వాట్సాప్‌ మెసేజ్‌లను గుడ్డిగా నమ్మెద్దు’ అని కాంగ్రెస్‌ అధికార ప్రతినిధి రణ్‌దీప్‌ సూర్జేవాలా పేర్కొన్నారు.

ఇదిలాఉంటే, బ్రిటన్‌ పర్యటనలో ఉన్న రాహుల్‌ గాంధీ పలు కార్యక్రమాల్లో పాల్గొంటున్నారు. ఈ సందర్భంగా ప్రధాని మోదీతోపాటు భాజపాపైనా విమర్శలు గుప్పిస్తున్నారు. దీంతో విదేశీ గడ్డపై భారత్‌ పరువు తీస్తున్నారని రాహుల్‌ గాంధీపై భాజపా నేతలు విరుచుకుపడుతున్నారు. ఈ క్రమంలోనే పొలిటికల్‌ క్లియరెన్స్‌ అంశాన్ని తెరమీదకు తీసుకువచ్చినట్లు తెలుస్తోంది.