రాజస్థాన్‌ మంత్రివర్గ విస్తరణ..పైలట్‌ వర్గానికి చోటు

జైపూర్‌:  రాజస్థాన్‌లో నూతన మంత్రివర్గం కొలువుదీరింది. 11 మంది కేబినెట్‌ మంత్రులు, నలుగురు సహాయ మంత్రులు సహా మొత్తం 15 మంది మంత్రులుగా ప్రమాణస్వీకారం చేశారు. వీరి చేత గవర్నర్‌ కల్‌రాజ్‌ మిశ్రా ప్రమాణ స్వీకారం చేయించారు. గత కేబినెట్‌లో సహాయ మంత్రులుగా పనిచేసిన మమతా భూపేశ్‌, భజన్‌లాల్‌ జాతవ్‌, టిక్రమ్‌ జుల్లీ కేబినెట్‌ ర్యాంక్‌ కల్పించారు. గతేడాది ప్రభుత్వానికి వ్యతిరేకంగా తిరుగుబాటు చేసిన విశ్వేంద్ర సింగ్‌, రమేశ్‌మీనాకు మళ్లీ మంత్రివర్గంలో చోటు కల్పించారు.

మంత్రివర్గ ప్రక్షాళనకు ముందు సీఎంతో కలిపి మొత్తం 21 మంది మంత్రులు ఉండడగా.. పునర్‌వ్యవస్థీకరణ అనంతరం ఆ సంఖ్య 30కి చేరింది. సీఎంతో కలిపి గరిష్ఠంగా 30 మంది మంత్రులు ఉండొచ్చు. గత కేబినెట్‌లో మంత్రులుగా పనిచేసిన గోవింద్‌ సింగ్‌ దోత్సారా, హరీశ్‌ చౌధరి, రఘు శర్మను మంత్రివర్గం నుంచి తప్పించగా.. మిగిలిన వారు యథావిధిగా కొనసాగారు. కొత్తగా 12 మంది మంత్రులుగా ప్రమాణం చేశారు. వీరిలో ఐదుగురు సచిన్‌ పైలట్‌ వర్గానికి చెందిన వారు ఉన్నారు. గతేడాది అశోక్‌ గహ్లోత్‌కు వ్యతిరేకంగా సచిన్‌పైలట్‌ వర్గం తిరుగుబాటు చేసిన సంగతి తెలిసిందే. అప్పట్లో రాజస్థాన్‌ రాజకీయాల్లో పెద్ద కుదుపు ఏర్పడింది. దీంతో పైలట్‌కు కాంగ్రెస్ అధిష్ఠానం నచ్చజెప్పింది. ఏడాది తర్వాత మంత్రివర్గంలో ఆ వర్గానికి చోటు కల్పించింది. సచిన్‌ పైలట్‌కు వచ్చే ఏడాది జరిగే గుజరాత్‌ ఎన్నికల బాధ్యతలను అధిష్ఠానం అప్పగించే అవకాశం ఉంది.

► Read latest National - International News and Telugu News