Revanth reddy: అక్రమాలు, పార్టీ ఫిరాయింపులకు అడ్డా.. ప్రగతిభవన్‌: రేవంత్‌

హైదరాబాద్‌: అక్రమాలకు, పార్టీ ఫిరాయింపులకు  ప్రగతిభవన్‌ అడ్డాగా మారిందని  పీసీసీ అధ్యక్షుడు రేవంత్‌ రెడ్డి (Revanth reddy) ఆరోపించారు. హాథ్‌ సే హాత్‌ జోడో అభియాన్‌ పాదయాత్ర  3వ రోజు పెనుగొండ నుంచి ఈదులపూసపల్లి, మహబూబాబాద్‌ వరకు సాగింది. ఈ సందర్భంగా రేవంత్‌ మాట్లాడుతూ.. మళ్లీ కాంగ్రెస్‌ వస్తేనే బాగుపడతామని ఆడబిడ్డలంటున్నారని చెప్పారు. ఎనిమిదో తేదీ వచ్చినా ప్రభుత్వ ఉద్యోగులకు జీతాలకు రాలేదని చెప్తున్నారన్నారు. 

‘‘రాష్ట్రంలో ఉద్యోగులు ఎవరూ సంతోషంగా లేరు. హరితహారం పేరుతో పోడు భూములు,  మెడికల్‌ కాలేజీ పేరుతో పేదల భూములు గుంజుకుంటున్నారు. స్థానిక ఎమ్మెల్యే.. ఎంపీలు భూ కబ్జాలు చేస్తున్నారు. కలెక్టర్లకు, కౌన్సిలర్లకు, పేదలకు రాష్ట్రంలో రక్షణ లేదు. నకిలీ విత్తనాలతో రైతులను మోసగించిన వారిపై పీడీ యాక్ట్‌ ఎందుకు పెట్టరు? అప్పుల బాధతో 29 మంది రైతులు పురుగులమందు తాగి చనిపోయారు. జనవరి 1, 2024లో కాంగ్రెస్‌ ప్రభుత్వం అధికారంలో ఉంటుంది. కాంగ్రెస్‌ అధికారంలోకి రాగానే పోడు భూములకు పట్టాలిస్తాం. భూ నిర్వాసితులకు పరిహార బాధ్యత కాంగ్రెస్‌ ప్రభుత్వానిది. పోలీసు ఉద్యోగులకు వారంలో ఒక రోజు సెలవు కల్పిస్తాం’’ అని రేవంత్‌ హామీ ఇచ్చారు.