Andhra News: ఏపీ రాజకీయ చిత్రపటంపై వైకాపా ప్లీనరీ తనదైన ముద్ర వేస్తుంది: విజయసాయి

గుంటూరు: వచ్చే ఎన్నికల్లో 175కి 175 స్థానాల్లో వైకాపా విజయం సాధిస్తుందని.. అందుకు అవసరమైన కార్యాచరణపై ప్లీనరీలో చర్చిస్తామని ఆ పార్టీ ఎంపీ విజయసాయిరెడ్డి తెలిపారు. గుంటూరు జిల్లాలో పార్టీ ప్లీనరీ ఏర్పాట్లను రాష్ట్ర ప్రభుత్వ సలహాదారు సజ్జల రామకృష్ణారెడ్డి, మంత్రి మేరుగ నాగార్జున, ఎమ్మెల్సీ ఉమ్మారెడ్డి వెంకటేశ్వర్లుతో కలిసి విజయసాయి పరిశీలించారు.

ఏర్పాట్లు పరిశీలించిన అనంతరం విజయసాయి మాట్లాడుతూ.. ‘‘జులై 8, 9 తేదీల్లో ఘనంగా ప్లీనరీ నిర్వహిస్తున్నాం. ఇతర పార్టీల కంటే భిన్నంగా ఏర్పాట్లు చేస్తున్నాం. గత ప్లీనరీలో నవరత్నాలను ప్రవేశపెట్టి అధికారంలోకి వచ్చాం. ఈసారి మరిన్ని మెరుగైన కార్యక్రమాలను చేపట్టి తిరిగి అధికారంలోకి వస్తాం. ప్లీనరీకి వచ్చే నాయకులను స్వయంగా ముఖ్యమంత్రి జగన్ ఆహ్వానిస్తారు. పార్టీ గౌరవ అధ్యక్షురాలు హోదాలో విజయమ్మ ప్లీనరీలో పాల్గొంటారు. ఏపీ రాజకీయ చిత్రపటంపై వైకాపా ప్లీనరీ తనదైన ముద్ర వేస్తుంది. భవిష్యత్ కార్యాచరణపై సీఎం జగన్ దిశానిర్దేశం చేస్తారు. పాలనలో సామాజిక విప్లవం తీసుకొచ్చిన ఏకైక నాయకుడిగా జగన్ చిరస్థాయిగా నిలుస్తారు’’ అని పేర్కొన్నారు.