Satya kumar: పీఎఫ్‌ఐ.. వైకాపా రెండూ ఒకటే: భాజపా నేత సత్యకుమార్‌

గుంటూరు: వైకాపాపై భాజపా జాతీయ కార్యదర్శి సత్యకుమార్ తీవ్రస్థాయిలో మండిపడ్డారు. ఆ పార్టీని నిషేధిత పాపులర్‌ ఫ్రంట్‌ ఆఫ్‌ ఇండియా(పీఎఫ్‌ఐ)తో పోల్చారు. గుంటూరులో నిర్వహించిన మీడియా సమావేశంలో సత్యకుమార్‌ మాట్లాడారు. పీఎఫ్‌ఐకు వైకాపాకు పెద్ద తేడాలేదని వ్యాఖ్యానించారు. ఆ సంస్థలాగే వైకాపావి కూడా విధ్వంసకర ఆలోచనలేనని మండిపడ్డారు.

సీఎం జగన్‌ సొంత నియోజకవర్గం పులివెందులలో  ఆయనకు సగం మంది మద్దతే ఉందని.. ఈ విషయం ప్రశాంత్‌ కిశోర్‌ (పీకే) టీమ్‌ సర్వేలో తేలిందన్నారు. అలాంటిది వైకాపా 175 సీట్లు ఎలా గెలుస్తుందని ప్రశ్నించారు. ఎమ్మె్ల్యేలంతా గడపగడపకు వెళ్లాలని ఆదేశించిన సీఎం.. ఆయనే నియోజకవర్గంలో పర్యటించాలని హితవు పలికారు. ప్రజావ్యతిరేకతపై జగన్‌ ఆత్మపరిశీలన చేసుకోవాలన్నారు. గృహనిర్మాణ పథకంపై సీఎం ఎన్నిసార్లు సమీక్ష నిర్వహించినా పురోగతి లేదని సత్యకుమార్‌ మండిపడ్డారు. రాష్ట్రంలో ఎక్కడా 10 శాతం కంటే ఎక్కువ ఇళ్లు నిర్మించలేదని ఆరోపించారు.