Published : 01 Feb 2022 01:16 IST

Assembly Elections 2022: ‘మేం మాట మీద నిలబడతాం’: ఉత్పల్‌ కోసం పోటీ వద్దనుకున్న శివసేన

పనాజీ: గోవా మాజీ ముఖ్యమంత్రి మనోహర్ పారికర్‌ తనయుడు ఉత్పల్‌కు భాజపా టికెట్‌ నిరాకరించగా.. శివసేన మద్దతు ప్రకటించింది. ఆయన పోటీచేస్తున్న పనాజీ నియోజకవర్గంలో పోటీ నుంచి విరమించుకుంది. తమ పార్టీ తరఫున అక్కడ నిలబడిన అభ్యర్థిని తప్పించింది. ఈ ఎన్నికల్లో పనాజీ నుంచి పోటీ చేయాలని భావించిన ఉత్పల్‌కు భాజపా టికెట్ దక్కలేదు. దాంతో అసంతృప్తికి గురైన ఆయన కమలం పార్టీకి గుడ్‌ బై చెప్పారు. ఆ స్థానం నుంచి స్వతంత్రంగా బరిలో నిలిచారు. 

ఉత్పల్‌కు పనాజీ నుంచి భాజపా టికెట్ ఇవ్వకపోతే.. విపక్షాలన్నీ ఆయనకు అండగా నిలవాలని ఇదివరకే శివసేన ఎంపీ సంజయ్‌ రౌత్ విజ్ఞప్తి చేశారు. చెప్పినట్టుగానే శివసేన పోటీ నుంచి తప్పుకుంది. ‘మేం మాట మీద నిలబడతాం. మా పార్టీ తరఫున నిలబడ్డ శైలేంద్ర అభర్థిత్వాన్ని వెనక్కి తీసుకుంటున్నాం. అదొక్కటే కాదు.. మా కార్యకర్తలు ఉత్పల్‌కు పూర్తి మద్దతు ఇస్తారు. ఇది కేవలం ఎన్నికల కోసమే కాదు. గోవా రాజకీయాల ప్రక్షాళన కోసం కూడా’ అంటూ రౌత్ ట్వీట్ చేశారు. అలాగే మహారాష్ట్ర మంత్రి ఆదిత్య ఠాక్రేను ట్యాగ్ చేశారు. అలాగే దివంగత మనోహర్ పారికర్ ప్రాతినిధ్యం వహించిన స్థానంలో ఒక నేర చరిత్ర ఉన్న వ్యక్తికి టికెట్ ఇస్తారా..?’ అంటూ భాజపాను ప్రశ్నించారు. 

మనోహర్ పారికర్ మూడుసార్లు గోవా ముఖ్యమంత్రిగా పనిచేశారు. అనారోగ్యం కారణంగా 2019లో మరణించారు. 25 సంవత్సరాల పాటు ఆయన పనాజీ స్థానానికి ప్రాతినిధ్యం వహించారు. పారికర్ మరణంతో జరిగిన ఉప ఎన్నికలో ఆయన దీర్ఘకాల ప్రత్యర్థి అటనాసియో మాన్సెరేటె కాంగ్రెస్ తరఫున విజయం సాధించారు. అనంతరం భాజపాలో చేరారు. ఆయన అత్యాచారం కేసులో ఆరోపణలు ఎదుర్కొంటున్నారు. ఈసారి ఆ స్థానం నుంచి తాను నిలబడతానని ఉత్పల్ భాజపా అధిష్ఠానాన్ని కోరినప్పటికీ.. కమలం పార్టీ అటనాసియో వైపే మొగ్గుచూపింది. దానికి బదులు వేరే స్థానం నుంచి టికెట్ ఇస్తానని వెల్లడించింది. అందుకు అంగీకరించని ఉత్పల్‌ భాజపాను వీడారు. ఇప్పటికే ఆయనకు ఆప్‌ నుంచి ఆహ్వానం అందిన సంగతి తెలిసిందే.

Read latest Politics News and Telugu News

Follow us on Facebook, Twitter, Instagram, Koo, ShareChat, and Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సు సాంకేతికతతో పంపబడతాయి. ఏ ప్రకటనని అయినా పాఠకులు తగినంత జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని