Somu Veerraju: ఆ విషయం పవన్‌నే అడగాలి: సోము వీర్రాజు

ఏలూరు: పొత్తుల విషయంలో తాము స్పష్టంగా ఉన్నామని.. జనసేనతో పొత్తు కొనసాగుతోందని భాజపా ఏపీ రాష్ట్రశాఖ అధ్యక్షుడు సోము వీర్రాజు అన్నారు. తెదేపా, జనసేన కలుస్తాయా? లేదా? అనేది జనసేన పార్టీ అధ్యక్షుడు పవన్‌కల్యాణ్‌నే అడగాలని చెప్పారు. ఏలూరులో సోము వీర్రాజు మీడియాతో మాట్లాడారు. పొత్తులపై నంద్యాల జిల్లాలో జరిగిన రచ్చబండ కార్యక్రమంలో పవన్‌ చేసిన వ్యాఖ్యలపై మీడియా ప్రతినిధులు ప్రశ్నించగా ఆ విషయాన్ని ఆయన్నే అడగాలని సోము వీర్రాజు వ్యాఖ్యానించారు. కుటుంబ పార్టీలతో భాజపా పొత్తు పెట్టుకోదని స్పష్టం చేశారు.

మరోవైపు శ్రీ సత్యసాయి జిల్లాలో బీ ఫార్మసీ విద్యార్థిని మృతి అంశంపై డీజీపీని కలుస్తామని సోము వీర్రాజు చెప్పారు. విద్యార్థిని తల్లిదండ్రులు ఆరోపిస్తున్న విధంగా ఈ కేసులో నిందితులందరిపైనా కేసులు నమోదు చేయాలని ఆయన డిమాండ్‌ చేశారు.