Andhra News: పవన్‌ కల్యాణ్‌ వైఖరికి అనుగుణంగానే ఏపీ రాజకీయాలు: సోము వీర్రాజు

దేవీచౌక్‌ (రాజమహేంద్రవరం): జనసేన అధినేత పవన్‌ కల్యాణ్‌ వైఖరికి అనుగుణంగానే రాష్ట్ర రాజకీయాలు ఉంటాయని భాజపా రాష్ట్ర అధ్యక్షుడు సోము వీర్రాజు అభిప్రాయపడ్డారు. తూర్పుగోదావరి జిల్లా రాజమహేంద్రవరంలోని భాజపా జిల్లా కార్యాలయం ఆవరణలో భోగి పండగను శనివారం నిర్వహించారు. ఈ కార్యక్రమంలో పాల్గొన్న ఆయన.. రాష్ట్ర ప్రజలు, కార్యకర్తలకు పండగ శుభాకాంక్షలు తెలిపారు. ఈ సందర్భంగా ఇటీవల శ్రీకాకుళం జిల్లా రణస్థలం యువశక్తి సభలో పవన్‌ కల్యాణ్‌ చేసిన వ్యాఖ్యలు తెదేపాకు దగ్గరవుతున్నట్లుగా ఉన్నాయని ఓ విలేకరి ప్రస్తావించగా సోము వీర్రాజు స్పందించారు. పవన్‌ మాటలు కొత్తగానే ఉన్నాయని, ఇంకా స్పష్టంగా ఉండాలని కోరుకుంటున్నానని చెప్పారు. ఆయన వ్యాఖ్యలపై స్పష్టత వస్తే అందరి కత్తులకు పదునెక్కుతుందని వ్యాఖ్యానించారు.