Tammineni: వార్‌ జోన్‌లో అడుగుపెట్టాం.. కురుక్షేత్రానికి మేం సిద్ధమే: స్పీకర్‌ తమ్మినేని

విజయవాడ: రాష్ట్రంలోని బీసీ కులాల కోసం కార్పొరేషన్లు ఏర్పాటు చేసి ఛైర్మన్లను నియమిస్తే తెదేపా (TDP) నేతలు హేళన చేస్తున్నారని ఏపీ శాసనసభ స్పీకర్‌ తమ్మినేని సీతారామ్‌ (Tammineni Sitaram) అన్నారు. బీసీల ఓట్ల కోసం ఆ పార్టీ నేతలు ముసుగులు వేస్తూ వస్తున్నారని ఆక్షేపించారు. విజయవాడ (Vijayawada)లోని ఇందిరాగాంధీ మున్సిపల్‌ స్టేడియంలో వైకాపా (YSRCP) ఆధ్వర్యంలో ‘జయహో బీసీ మహాసభ’ నిర్వహించారు. ఈ సభకు బీసీ మంత్రులు, ఎంపీలు, ఎమ్మెల్యేలు, ఎమ్మెల్సీలు, రాష్ట్రంలోని వివిధ ప్రాంతాల నుంచి ఇతర ప్రజాప్రతినిధులు, వివిధ బీసీ కార్పొరేషన్ల ఛైర్మన్లు, డైరెక్టర్లు హాజరయ్యారు. 

ఈ సందర్భంగా తమ్మినేని మాట్లాడుతూ.. ‘‘బీసీల కోసం సీఎం జగన్‌ (CM Jagan) నేరుగా బటన్‌ నొక్కి సంక్షేమ పథకాలు అందిస్తున్నారు. గత ఐదేళ్లలో బీసీలకు చంద్రబాబు రూ.964 కోట్లు మాత్రమే ఇచ్చారు. ఈ మూడేళ్లలోనే జగన్‌ రూ.90,415 కోట్లు అందించారు. రాబోయే సార్వత్రిక కురుక్షేత్రానికి మేం సిద్ధంగా ఉన్నాం. ఐకమత్యంగా జగన్‌ వెంట ఉండి మళ్లీ ఆయన్ను సీఎంను చేస్తేనే ఈ సభకు సార్థకత. మనం వార్‌ జోన్‌లో అడుగుపెట్టాం. శత్రు సంహారం చేసి జగన్‌ను మళ్లీ సీఎంగా చూడాల్సిన బాధ్యత మనపై ఉంది’’ అని తమ్మినేని సీతారామ్‌ అన్నారు.