West Bengal: అమిత్‌ షాతో సువేందు అధికారి భేటీ

రేపు ప్రధానితో సమావేశం కానున్నట్లు సమాచారం

దిల్లీ: పశ్చిమబెంగాల్‌లో అసెంబ్లీ ఎన్నికలు పూర్తైనప్పటికీ రాజకీయం వాతావరణం వాడీవేడీగా కొనసాగుతోంది. ముఖ్యంగా ఎన్నికల తర్వాత చోటుచేసుకున్న హింసాత్మక సంఘటనలపై భాజపా, తృణమూల్‌ కాంగ్రెస్‌ల మధ్య మాటల యుద్ధం కొనసాగుతూనే ఉంది. ఈ నేపథ్యంలో బెంగాల్‌ అసెంబ్లీలో ప్రతిపక్ష నేత సువేందు అధికారి, కేంద్ర హోంశాఖ మంత్రి అమిత్ షాతో భేటీ అయ్యారు. రాష్ట్రంలో తాజా రాజకీయ పరిస్థితులు, పార్టీ కార్యకర్తలపై జరిగిన దాడులకు సంబంధించిన అంశాలను అమిత్‌ షాతో చర్చించారు. రెండు రోజుల పాటు దిల్లీలోనే ఉండనున్న అధికారి, పలువురు కేంద్ర మంత్రులను కలువనున్నారు. ప్రధానమంత్రి నరేంద్రమోదీని కూడా సువేందు అధికారి బుధవారం నాడు కలువనున్నట్లు సమాచారం. బెంగాల్‌లో శాంతి భద్రతలు ఆందోళనకరంగా ఉన్నాయని గవర్నర్‌ జగదీప్‌ ధన్‌కడ్‌ పేర్కొన్న నేపథ్యంలో.. సువేందు అధికారి దిల్లీ పర్యటన ప్రాధాన్యత సంతరించుకుంది.

‘బెంగాల్‌లో తాజా రాజకీయ పరిస్థితులతో పాటు అనేక విషయాలపై కేంద్రమంత్రి అమిత్‌ షాతో చర్చించాను. ఈ సందర్భంగా బెంగాల్‌ సంక్షేమం కోసం తానెప్పుడూ సహకరిస్తామని హామీ ఇచ్చారు’ అని సువేందు అధికారి పేర్కొన్నారు.

పశ్చిమ బెంగాల్‌లో అసెంబ్లీ ఎన్నికల అనంతరం చోటుచేసుకున్న హింసాత్మక ఘటనల్లో పలువురు భాజపా కార్యకర్తలు ప్రాణాలు కోల్పోయినట్లు భాజపా ఆరోపిస్తోంది. వీటిపై రాష్ట్ర గవర్నర్‌ జగదీప్‌ ధన్‌కడ్‌కు భాజపా రాష్ట్ర కార్యవర్గం ఫిర్యాదు చేసింది. తాజాగా ఈ అంశాలను కేంద్ర హోంశాఖతోపాటు ప్రధాని దృష్టికి తీసుకెళ్లేందుకు ప్రయత్నాలు చేస్తోంది. అయితే, తమ కార్యకర్తలపై టీఎంసీ నేతలు దాడి చేశారంటూ భాజపా చేస్తోన్న ఆరోపణలను తృణమూల్‌ కొట్టిపారేస్తోంది. ఇదిలాఉండగా, బెంగాల్‌లో చోటుచేసుకుంటున్న పరిణామాలపై ఇప్పటికే దృష్టిసారించిన కేంద్ర ప్రభుత్వం, దాడుల ఘటనపై గవర్నర్‌ నుంచి నివేదికలు తెప్పించుకున్నట్లు సమాచారం.