Subramanian Swamy: భాజపాలో ఎన్నికల్లేవ్‌.. అంతా ‘మోదీ’ ఆమోదంతోనే..!

భాజపా పార్లమెంటరీ బోర్డులో ఇటీవల చోటుచేసుకున్న వ్యవస్థాగత మార్పులపై మాజీ ఎంపీ సుబ్రహ్మణ్య స్వామి (Subramanian Swamy) విమర్శలు గుప్పించారు.

Published : 19 Aug 2022 01:58 IST

పార్టీలో నియామకాలపై సుబ్రహ్మణ్య స్వామి విమర్శలు

దిల్లీ: భాజపా పార్లమెంటరీ బోర్డులో తాజాగా చోటుచేసుకున్న వ్యవస్థాగత మార్పులపై మాజీ ఎంపీ సుబ్రహ్మణ్య స్వామి (Subramanian Swamy) విమర్శలు గుప్పించారు. ఆఫీస్‌ బేరర్లను నియమించేందుకు పార్టీ సంస్థాగత ఎన్నికలను దూరం పెట్టిందన్న ఆయన.. ప్రధాని మోదీ (Narendra Modi) ఆమోదంతోనే సభ్యులంతా నామినేట్‌ అవుతున్నారని ఆరోపించారు. గతంలో ఆఫీస్‌ బేరర్ల నియామకాలన్నీ పార్టీలో ఎన్నికల ద్వారానే జరిగేవని స్వామి గుర్తుచేశారు.

‘జనతా పార్టీ తొలినాళ్లలో (ఇప్పుడు భాజపా) ఆఫీస్‌ బేరర్ల పోస్టులను భర్తీ చేసేందుకు పార్టీ, పార్లమెంటరీ పార్టీ ఎన్నికలు జరిగేవి. పార్టీ నిబంధనలు కూడా ఇదే విషయాన్ని చెబుతాయి. కానీ, ప్రస్తుతం భాజపాలో ఎన్నికలనే మాటే లేదు. ఏ పోస్టుకు సభ్యుడిని నామినేట్‌ చేయాలన్నా అది మోదీ ఆమోదంతోనే జరుగుతోంది’ అని పేర్కొంటూ మాజీ ఎంపీ సుబ్రహ్మణ్య స్వామి ట్వీట్‌ చేశారు. ఈ విషయంపై స్పందించిన భాజపా నేతలు మాత్రం.. పార్టీలో ఏ స్థానాన్ని భర్తీ చేయాలన్నా పార్టీ అధ్యక్షుడే నామినేట్‌ చేస్తారన్నారు. అనంతరం పార్టీ జాతీయ కార్యవర్గం లేదా ఇతర విభాగాలు వాటిని ఆమోదిస్తాయని.. పార్టీలో ఈ సంప్రదాయం ఎన్నోఏళ్లుగా కొనసాగుతోందని చెబుతున్నారు.

ఇక పార్టీ తరపున ఎంపీగా ఉన్న సమయంలోనూ పలు అంశాలపై సొంతపార్టీపైనే విమర్శలు గుప్పించేవారు సుబ్రహ్మణ్య స్వామి. ప్రస్తుతం విరాట్‌ హిందుస్థాన్‌ సంఘం (VHS) అధ్యక్షుడిగా కొనసాగుతున్న ఆయన.. తాజాగా పశ్చిమ్‌బెంగాల్‌ ముఖ్యమంత్రి మమతా బెనర్జీతో భేటీ అయ్యారు.

ఇదిలాఉంటే, పార్టీలో వ్యవస్థాగత మార్పులకు శ్రీకారం చుట్టిన భాజపా..  పార్లమెంటరీ బోర్డులో నిన్న మార్పులు చేసిన సంగతి తెలిసిందే. అందులో నుంచి కేంద్ర మంత్రి నితిన్‌ గడ్కరీ, మధ్యప్రదేశ్‌ ముఖ్యమంత్రి శివరాజ్‌సింగ్‌ చౌహాన్‌లను తప్పించి.. కొత్తగా ఆరుగురు నేతలకు చోటుకల్పించింది. వారిలో తెలంగాణకు చెందిన సీనియర్‌ నేత కె.లక్ష్మణ్‌, కర్ణాటక మాజీ సీఎం బి.ఎస్‌.యడియూరప్ప తదితరులు ఉన్నారు. మరోవైపు- భాజపా కేంద్ర ఎన్నికల కమిటీ(సీఈసీ)నీ కూడా పార్టీ అధ్యక్షుడు జె.పి.నడ్డా పునర్‌వ్యవస్థీకరించారు. మహారాష్ట్ర ఉప ముఖ్యమంత్రి దేవేంద్ర ఫడణవీస్‌, కేంద్రమంత్రి భూపేందర్‌ యాదవ్‌ తదితరులను కొత్తగా కమిటీలోకి తీసుకున్నారు.

Read latest Politics News and Telugu News

Follow us on Facebook, Twitter, Instagram & Google News.

Tags :

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.


మరిన్ని

ap-districts
ts-districts

ఎక్కువ మంది చదివినవి (Most Read)

మరిన్ని