Chandrababu: సోషల్‌ మీడియాలో ప్రశ్నిస్తే ప్రాణాలు తీస్తారా?: చంద్రబాబు

అమరావతి: శ్రీకాకుళం జిల్లా మందస మండలం పొత్తంగి గ్రామానికి చెందిన తెదేపా కార్యకర్త కోన వెంకట్రావుది మూమ్మాటికీ హత్యేనని ఆ పార్టీ అధినేత చంద్రబాబు ధ్వజమెత్తారు. సోషల్‌ మీడియాలో ప్రశ్నిస్తే వేధించి ప్రాణాలు తీస్తారా?అని మండిపడ్డారు. ఈ ఘటనలో ఎమ్మెల్సీ దువ్వాడ శ్రీనివాస్‌, పోలీసులపై కేసు నమోదు చేయాలని చంద్రబాబు డిమాండ్‌ చేశారు. వెంకట్రావు కుటుంబానికి తన ప్రగాఢ సానుభూతి తెలిపారు. 

‘‘తెదేపా కార్యకర్త కోన వెంకట్రావును వైకాపా నాయకులు వేధించారు. బలవన్మరణానికి పాల్పడేలా చేసిన వైకాపా దుర్మార్గాన్ని ఖండిస్తున్నా. సోషల్‌ మీడియాలో పోస్టు పెట్టడమే నేరంగా వెంకట్రావును వేధించారు. కార్యకర్త మృతికి కారకులైన ఎమ్మెల్సీ దువ్వాడ, పోలీసులనూ అరెస్టు చేయాలి. బాధిత కుటుంబానికి తెదేపా అండగా ఉంటుంది. పోలీసులను అడ్డుపెట్టుకొని వేధిస్తే తిరుగుబాటు తప్పదు’’ తెదేపా జాతీయ ప్రధాన కార్యదర్శి లోకేశ్‌ హెచ్చరించారు.