Chandrababu: కుప్పంలో దాడుల సంస్కృతి దురదృష్టకరం: చంద్రబాబు

అమరావతి: కుప్పంలో హోటల్‌పై వైకాపా కౌన్సిలర్ల దాడిని తెదేపా అధినేత చంద్రబాబు ఖండించారు. కుప్పంలో దాడుల సంస్కృతిని వైకాపా తీసుకురావడం దురదృష్టకరమన్నారు. హోటల్‌లో ఫర్నీచర్‌ ధ్వంసం చేసి మహిళలను బెదిరించారని ఆగ్రహం వ్యక్తం చేశారు. ఈ దాడి ఘటనపై పోలీసులు చర్యలు తీసుకోవాలని డిమాండ్‌ చేశారు. బాధిత కుటుంబానికి తెదేపా అండగా ఉంటుందని చంద్రబాబు ట్విటర్‌ వేదికగా భరోసా ఇచ్చారు.

కుప్పం పట్టణం బైపాస్‌ మార్గంలోని ఓ దాబాలో వైకాపా నాయకులు వీరంగం సృష్టించిన సీసీ ఫుటేజీ వీడియో ఆదివారం సామాజిక మాధ్యమాల్లో వైరలైంది. కుప్పం మున్సిపాలిటీకి చెందిన ఓ కౌన్సిలర్‌, మరో కౌన్సిలర్‌ కుమారుడు, వారి అనుచరులు దాబాపై దాడి చేసినట్లు నిర్వాహకులు తెలిపిన విషయం తెలిసిందే.