Darapaneni Narendra: తెదేపా మీడియా ఇన్‌ఛార్జి నరేంద్రకు బెయిల్‌ మంజూరు

గుంటూరు: తెదేపా మీడియా సమన్వయకర్త దారపనేని నరేంద్రబాబుకు బెయిల్‌ లభించింది. గన్నవరం విమానాశ్రయంలో ఇటీవల వెలుగుచూసిన బంగారం స్మగ్లింగ్‌కు సంబంధించి సీఎంఓలోని ఓ కీలక అధికారికి సంబంధం ఉందని వాట్సప్‌ గ్రూపులో పోస్టులు ఫార్వర్డ్‌ చేశారన్న ఆరోపణలతో బుధవారం రాత్రి సీఐడీ అధికారులు నరేంద్రను అరెస్టు చేసిన సంగతి తెలిసిందే. అనంతరం ఆయనను గుంటూరు సీఐడీ ప్రాంతీయ కార్యాలయానికి తరలించారు. గురువారం సాయంత్రం 6 గంటలకు న్యాయమూర్తి ఎదుట హజరుపరిచేందుకు గుంటూరులోని సీఐడీ ప్రత్యేక న్యాయస్థానం ప్రాంగణానికి తీసుకొచ్చారు. అప్పటికే కోర్టు సమయం ముగిసిపోవడంతో న్యాయమూర్తి ఇంటివద్ద హాజరుపరిచారు. నరేంద్ర వాంగ్మూలం నమోదుచేసుకున్న న్యాయమూర్తి కె.శృతవింద ఆయనకు జీజీహెచ్‌లో వైద్యపరీక్షలు చేయించి నివేదిక అందజేయాలని అధికారులను ఆదేశించారు. అనంతరం భారీ బందోబస్తు మధ్య రాత్రి 10.30 గంటల సమయంలో నరేంద్రను గుంటూరు జీజీహెచ్‌కు తరలించారు. వైద్యపరీక్షల అనంతరం ఆయనను న్యాయమూర్తి ఇంటికి పోలీసులు తీసుకొచ్చారు. అర్ధరాత్రి 2 గంటలకు సీఐడీ అధికారులు న్యాయమూర్తి ఎదుట హాజరు పరిచి వైద్యుల నివేదికను అందించారు. ఇరుపక్షాల వాదనలు విన్న తర్వాత నరేంద్రకు న్యాయమూర్తి బెయిల్‌ మంజూరు చేశారు.