AP Assembly: చంద్రబాబు అరెస్ట్‌పై శాసనసభలో తెదేపా ఎమ్మెల్యేల నిరసన

అమరావతి: ఏపీ శాసనసభ సమావేశాల మొదటి రోజే తీవ్ర గందరగోళ పరిస్థితులు నెలకొన్నాయి. తెదేపా అధినేత చంద్రబాబును అక్రమంగా అరెస్ట్‌ చేశారని.. ఆ అంశంపై చర్చించాలంటూ తెదేపా వాయిదా తీర్మానం ఇచ్చింది. దీనిపై చర్చకు స్పీకర్‌ నిరాకరించడంతో తెదేపా ఎమ్మెల్యేలు ఆందోళనకు దిగారు. స్పీకర్‌ పోడియం వద్దకు ప్లకార్డులతో వెళ్లి నిరసన తెలిపారు. ఆందోళన చేస్తున్న తెదేపా సభ్యులపైకి వైకాపా సభ్యులు దూసుకొచ్చారు. ఈ క్రమంలో ఇరు పక్షాల మధ్య వాగ్వాదం చోటుచేసుకుంది. ఈ పరిస్థితులతో సభలో కొంత గందరగోళ పరిస్థితులు నెలకొన్నాయి. దీంతో స్పీకర్‌ సభను కాసేపు వాయిదా వేశారు.