Atchennaidu: ఏపీలో మూడు రకాల ట్యాక్స్‌ల దందా: అచ్చెన్నాయుడు

అమరావతి: ఏపీలో జేఎంఎం పేరిట మూడు రకాల ట్యాక్స్‌ల దందా నడుస్తోందని తెదేపా రాష్ట్ర అధ్యక్షుడు కింజరాపు అచ్చెన్నాయుడు విమర్శించారు. రాష్ట్రస్థాయిలో జె ట్యాక్స్‌.. జిల్లా స్థాయిలో మంత్రి ట్యాక్స్‌.. నియోజకవర్గ స్థాయిలో ఎమ్మెల్యే ట్యాక్స్‌ అమలవుతోందని ఆయన ఆరోపించారు. ఈ మేరకు అచ్చెన్నాయుడు ఓ ప్రకటన విడుదల చేశారు. 

‘‘ఏ పని ప్రారంభించాలన్నా కొబ్బరికాయ కొట్టే ముందు జె ట్యాక్స్‌ కట్టాల్సి వస్తోందనడానికి వైకాపా ఎమ్మెల్యే కాపు రామచంద్రారెడ్డి సన్నిహితుడు జయరామిరెడ్డి బరితెగింపులే నిదర్శనం. రాయదుర్గంలో జయరామిరెడ్డి చర్యను తీవ్రంగా ఖండిస్తున్నా. పనులు చేస్తున్నవారిని బెదిరించడం సిగ్గుచేటు. వైకాపా నేతల తీరుతో రాష్ట్రంలో పనులు చేసేందుకు ఏ కాంట్రాక్టరూ ముందుకు రావడం లేదు. మద్యం, ఇసుక, మైనింగ్‌, జూదం ద్వారా సంపాదిస్తోంది సరిపోక కాంట్రాక్టర్లపైనా పడ్డారు. గత రెండేళ్లలో ఎంతో మంది కాంట్రాక్టర్లను ముడుపుల కోసం బెదిరించి తరిమేశారు’’ అని అచ్చెన్నాయుడు ఆరోపించారు.