AP News: గుంటూరులో జిన్నా టవర్‌ సెంటర్‌ పేరు మార్చాలి: భాజపా

గుంటూరు‌: గుంటూరు నగరంలోని జిన్నా టవర్‌ సెంటర్‌ పేరు మార్చాలని పలువురు భాజపా నేతలు డిమాండ్ చేశారు. దేశద్రోహుల పేర్లు ఎక్కడున్నా తొలగించాలని ఆ పార్టీ రాష్ట్ర అధ్యక్షుడు సోము వీర్రాజు వ్యాఖ్యానించారు. దేశ విభజనకు కారణమైన జిన్నా పేరిట టవర్‌తో పాటు ఆ ప్రాంతానికి జిన్నా పేరు ఎలా కొనసాగిస్తారని భాజపా జాతీయ కార్యదర్శి సత్యకుమార్ అభ్యంతరం వ్యక్తం చేశారు. ఈ మేరకు ఆయన ట్వీట్‌ చేశారు.

మరోవైపు హైదరాబాద్‌లోని గోషామహల్‌ ఎమ్మెల్యే రాజాసింగ్ కూడా దీనిపై ఆగ్రహం వ్యక్తం చేశారు. దేశ విభజన, అనేక మంది మృతికి కారణమైన జిన్నా పేరును ఇంకా ఎందుకు ఉంచారని ఆయన ప్రశ్నించారు. ఏపీ ప్రభుత్వం తక్షణమే ఆ పేరు తీసేయాలని రాజాసింగ్‌ డిమాండ్‌ చేశారు. తక్షణం జిన్నా పేరు తీసేసి స్వాతంత్య్ర సమరయోధులు, అబ్దుల్‌కలాం లేదా గుర్రం జాషువా పేరు పెట్టాలన్నారు.