TS News: తెరాస అసమర్థత వల్లే రైతులకు ఇబ్బందులు: ఉత్తమ్‌కుమార్‌

హైదరాబాద్: తెరాస ప్రభుత్వం అసమర్థత వల్ల వరి రైతులు తీవ్రంగా ఇబ్బందులు పడుతున్నారని కాంగ్రెస్‌ ఎంపీ, టీపీసీసీ మాజీ అధ్యక్షుడు ఉత్తమ్‌కుమార్‌రెడ్డి ఆరోపించారు. మంత్రులు అసమర్థత వల్లే రైతులు తీవ్రంగా నష్టపోతున్నారన్నారు. హైదరాబాద్‌లో ఆయన మీడియాతో మాట్లాడారు. కేంద్రం ఆనాడు ధాన్యం కొనుగోళ్ల విషయంలో చెప్పిన దానికి మౌనంగా ఉండి.. ఇప్పుడు మంత్రులు గొడవకు దిగుతున్నారని విమర్శించారు. గత యాసంగిలో 52లక్షల ఎకరాల్లో వరి వేసిన రైతులను.. ఇప్పుడు అసలు వేయొద్దంటే ఎలా అని ఉత్తమ్‌ ప్రశ్నించారు. సింగరేణి గనుల ప్రైవేటీకరణపై పార్లమెంట్‌లో తెరాస ఎంపీలు మాట్లాడలేదని ఆక్షేపించారు. భాజపా, తెరాసలు అంతర్గతంగా పొత్తులోనే ఉన్నాయని ఉత్తమ్‌ ఆరోపించారు. 

‘‘పంట మార్పిడి జరగాలంటే దానికి రైతులను సమాయత్తం చేయాలి. ఉన్నట్టుండి వేయొద్దంటే అది అవగాహనా రాహిత్యం. ప్రతిగింజా కొంటామని అసెంబ్లీలో కేసీఆర్ చెప్పారు. ఇప్పుడేమో ఒక్క గింజా కొనం అంటున్నారు. కేసీఆర్ పాలనలో రాష్ట్రంలో వ్యవస్థలన్నీ కుప్పకూలాయి. ధాన్యం కొనుగోళ్లకు రాష్ట్ర ప్రభుత్వం రూ. 5 వేల కోట్లు కేటాయిస్తే అసలు సమస్యే ఉండదు’’ అని ఉత్తమ్‌ అన్నారు.