TS News: రేపు తెరాసలోకి కౌశిక్‌ రెడ్డి

హైదరాబాద్‌: హుజూరాబాద్‌ నాయకుడు కౌశిక్‌ రెడ్డి అధికార పార్టీ తెరాసలో చేరనున్నారు. రేపు మధ్యాహ్నం తెలంగాణ భవన్‌లో సీఎం కేసీఆర్‌ సమక్షంలో చేరేందుకు ఆయన నిర్ణయం తీసుకున్నారు. కౌశిక్‌రెడ్డి ఇటీవల కాంగ్రెస్‌ పార్టీకి రాజీనామా చేసిన విషయం తెలిసిందే.

హుజూరాబాద్‌ అభివృద్ధికే తెరాసలోకి: కౌశిక్‌

హుజూరాబాద్‌ నియోజకవర్గ అభివృద్ధి కోసమే తాను తెరాసలో చేరుతున్నట్లు కౌశిక్‌రెడ్డి తెలిపారు. రేపు మధ్యాహ్నం ఒంటిగంటకు తెరాసలో చేరుతానని వెల్లడించారు. కొండాపూర్‌లోని నివాసంలో మీడియా సమావేశం ఏర్పాటు చేసిన ఆయన మాట్లాడారు. ‘‘పెద్దఎత్తున నా సైనికులు రేపు తెలంగాణ భవన్‌కు రావాలని కోరుతున్నా. సీఎం కేసీఆర్‌ కృషితో రైతులంతా సంతోషంగా ఉన్నారు. కాళేశ్వరం, ఎల్‌ఎండీ జలాలతో సమృద్ధిగా పంటలు పండుతున్నాయి. రైతుల సంక్షేమం కోసం కేసీఆర్ ఎన్నో పథకాలు తెచ్చారు. ఈటల రాజేందర్‌ హుజూరాబాద్‌ అభివృద్ధిని విస్మరించారు. ప్రజా సమస్యల కోసం కాదు.. స్వలాభం కోసం ఆయన రాజీనామా చేశారు’ అని కౌశిక్‌ అన్నారు.