Ap News: ఆ త‌ప్పు మ‌రోసారి పున‌రావృతం కాకూడదు: రామ్మోహన్‌ నాయుడు

మచిలీపట్నం: ‘‘వైకాపా చేసిన త‌ప్పుడు ప్రచారాల‌ను తిప్పికొట్టడంలో వెనుక‌ప‌డ్డాం. అందుకే ఇవాళ ఇలా ప్రతిప‌క్షంలో ఉన్నాం. ఆ త‌ప్పు మ‌రోసారి పున‌రావృతం కాకూడదు.  మూడేళ్ల వైకాపా పాలన చూశాం. ఎంత క‌క్షపూరితంగా, దుర్మార్గంగా, మోస‌పూరితంగా పాలన సాగిస్తోందో అంద‌రూ గ‌మ‌నిస్తున్నారు’’ అని తెదేపా ఎంపీ కింజరాపు రామ్మోహన్ నాయుడు అన్నారు. తెదేపా ఆధ్వర్యంలో కృష్ణా జిల్లా మ‌చిలీప‌ట్నం నియోజ‌క‌వ‌ర్గ స్థాయి పార్టీ శిక్షణా త‌ర‌గ‌తుల ముగింపు కార్యక్రమంలో కొల్లు రవీంద్రతో కలిసి ఆయన పాల్గొన్నారు.

‘‘ప్రభుత్వ వైఫ‌ల్యాల‌ను ప్రజ‌ల్లోకి తీసుకెళ్ళి, వారికి అవ‌గాహన క‌ల్పించాలి. త‌ద్వారా భవిష్యత్‌లో జరగబోయే ఎన్నికల్లో తెదేపా గెలుపునకు కృషి చేయాలి. 2024లో అధికారమే లక్ష్యంగా ప్రతి కార్యకర్త సుశిక్షుతులై శ్రమించాలి. ప్రత్యేక హోదా అంశాన్ని మర్చిపోయిన సీఎం జగన్.. దిల్లీ వెళ్లేందుకు భయపడుతున్నారు. తెదేపాను రాజకీయంగా ఎదుర్కోలేక నేతలపై అక్రమ కేసులు బనాయిస్తున్నారు. అక్రమ కేసులకు భయపడే పార్టీ తెలుగుదేశం కాదు.. ఎదురు నిలిచి పోరాడే పార్టీ. తెలుగుదేశం పార్టీ హయాంలోనే రాష్ట్రంలో అభివృద్ధి జరిగింది’’ అని రామ్మోహన్‌నాయుడు అన్నారు.