AP News: ఎయిడెడ్‌ విలీనంపై విద్యార్థుల ఆందోళన.. విజయవాడలో ఉద్రిక్తత

విజయవాడ: ఎయిడెడ్‌ విద్యాసంస్థల విలీన నిర్ణయాన్ని వ్యతిరేకిస్తూ విజయవాడలో జనసేన, పలు విద్యార్థి సంఘాలు చేపట్టిన ధర్నా ఉద్రిక్తతకు దారి తీసింది. వన్‌టౌన్‌ పరిధి కొత్తపేటలోని ఎస్‌కేపీవీ హిందూ హైస్కూల్‌ ముందు ఆందోళన చేపడుతున్న విద్యార్థులు, నాయకులను పోలీసులు అదుపులోకి తీసుకున్నారు. దీనికి నిరసనగా పోలీసు వాహనాలపై విద్యార్థులు దాడికి యత్నించారు. 

పరిస్థితి చేయి దాటుతుండటంతో అదుపులోకి తీసుకున్న నాయకులను పోలీసులు విడిచిపెట్టడంతో విద్యార్థులు శాంతించారు. ఎయిడెడ్‌ విద్యాసంస్థల విలీనానికి సంబంధించిన జీవోలను రద్దు చేస్తున్నట్లు రాష్ట్ర ప్రభుత్వం ప్రకటించకపోతే విద్యార్థులతో కలిసి తాడేపల్లిలోని సీఎం క్యాంపు కార్యాలయాన్ని ముట్టడిస్తామని జనసేన నేత పోతిన మహేశ్‌ హెచ్చరించారు.