Atchannaidu: జగన్‌.. ఉత్తరాంధ్రకు ఏం చేశారు?: అచ్చెన్నాయుడు

విశాఖ: ఉత్తరాంధ్ర సమస్యలను ఈ ప్రాంత మంత్రులు సీఎం జగన్‌ వద్ద ప్రస్తావించగలరా? అని తెదేపా ఏపీ అధ్యక్షుడు అచ్చెన్నాయుడు ప్రశ్నించారు. విశాఖ తెదేపా కార్యాలయంలో నిర్వహించిన ‘ఉత్తరాంధ్ర రక్షణ- చర్చా వేదిక’ కార్యక్రమంలో ఆయన మాట్లాడారు. విశాఖ మెడ్‌టెక్‌ జోన్‌పై గతంలో వైకాపా నేతలు ఇష్టమొచ్చినట్లు మాట్లాడారని.. కరోనా సమయంలో అదే ప్రజల ప్రాణాలు కాపాడిందన్నారు. 

అభివృద్ధి చేయాలని సీఎం అనుకుంటే ఏమైనా చేయొచ్చని.. జగన్‌ ఈ ప్రాంతానికి ఏం చేశారని అచ్చెన్న ప్రశ్నించారు. అభివృద్ధి చేయలేకే మూడు రాజధానుల అంశాన్ని తెరపైకి తీసుకొచ్చారని ఆయన విమర్శించారు. ఉత్తరాంధ్ర ప్రాంతానికి తెదేపా ఏం చేసిందో చెబుతామని.. మీరేం చేశారో చెప్పగలరా? అని వైకాపాకు అచ్చెన్నాయుడు సవాల్‌ విసిరారు.