AP News: ఓటీఎస్‌ పేరుతో రూ.5వేల కోట్ల దోపిడీకి యత్నం: తెదేపా

అమరావతి: ‘ఓటీఎస్‌ వసూళ్లు పేదలకు ఉరితాళ్లు’ అంటూ అన్ని జిల్లా కలెక్టరేట్ల వద్ద తెదేపా నిరసన ప్రదర్శనలు చేపట్టింది. ఓటీఎస్‌ పేరుతో పేదల నుంచి రూ.5వేల కోట్లు దోచుకునేందుకు అధికార పార్టీ మాస్టర్‌ ప్లాన్‌ వేసిందని తెదేపా నేతలు ఆరోపించారు. ప్రభుత్వానికి చిత్తశుద్ధి ఉంటే పేదల ఇళ్లను ఉచితంగా రిజిస్ట్రేషన్‌ చేసి ఇవ్వాలని డిమాండ్ చేశారు. ప్రకాశం జిల్లా ఒంగోలులో తెదేపా కదం తొక్కింది. పెద్ద ఎత్తున తరలివచ్చిన ఆ పార్టీ శ్రేణులు ప్రభుత్వ తీరుకు వ్యతిరేకంగా నినాదాలు చేశారు. ర్యాలీగా కలెక్టరేట్ వరకు వెళ్లి అధికారులకు వినతిపత్రం అందజేశారు. పేదలను ఓటీఎస్‌ పేరిట వేధించడం సరికాదని ఎమ్మె్ల్యే డోలా వీరాంజనేయస్వామి, పార్టీ నేత దామచర్ల జనార్థన్‌ మండిపడ్డారు.

తూర్పు గోదావరి జిల్లా కాకినాడలో ఓటీఎస్‌కు వ్యతిరేకంగా తెదేపా శ్రేణులు భారీ ఆందోళన కార్యక్రమాన్ని చేపట్టాయి. ఓటీఎస్‌ రద్దు చేయాలంటూ తెదేపా నేతలు చినరాజప్ప, జ్యోతుల నెహ్రు, కొండబాబు నిరసన చేపట్టారు. నిరసన కారులను పోలీసులు అడ్డుకునే ప్రయత్నం చేయగా ఉద్రిక్త పరిస్థితులు ఏర్పడ్డాయి. గుంటూరు మున్సిపల్‌ కార్యాలయం నుంచి కలెక్టరేట్‌ వరకు తెదేపా నేతలు ర్యాలీ చేపట్టారు. ఆ పార్టీ నేతలు ప్రత్తిపాటి, ఆలపాటి రాజా, యరపతినేని, జీవీ ఆంజనేయులు, నక్కా ఆనందబాబు కలెక్టరేట్‌ ముట్టడికి యత్నించగా పోలీసులు చెదరగొట్టారు. కడప కలెక్టరేట్‌ ముట్టడికి తెదేపా నాయకులు యత్నించగా పోలీసులు అడ్డుకున్నారు. కర్నూలు తెదేపా శ్రేణులు భారీగా ర్యాలీ చేపట్టారు. ఓటీఎస్‌ను రద్దు చేయాలంటూ ప్రభుత్వానికి వ్యతిరేకంగా నినాదాలు చేశారు. మిగతా జిల్లాల్లోనూ తెదేపా నేతలు, శ్రేణులు ఓటీఎస్‌కు వ్యతిరేకంగా ర్యాలీలు, నిరసనలు చేపట్టారు.