రసాభాసగా సర్వసభ్య సమావేశం.. తెరాస, భాజపా శ్రేణుల వాగ్వాదం

జైనథ్‌: ఆదిలాబాద్‌ జిల్లా జైనథ్‌ మండల సర్వసభ్య సమావేశం తెరాస, భాజాపా శ్రేణుల మధ్య వాగ్వాదానికి దారి తీసింది. ఎమ్మెల్యే జోగు రామన్న నేతృత్వంలో సమావేశం జరిగిన తర్వాత గందరగోళ పరిస్థితి నెలకొంది. సమావేశ మందిరం నుంచి జోగు రామన్న బయటకు వెళ్తున్న సమయంలో.. భాజపా సర్పంచ్‌ పాయల్‌ శరత్‌ ప్రత్యేక అభివృద్ధి ఫండ్‌ (ఎస్‌డీఎఫ్‌) నిధుల వినియోగంపై ప్రశ్నించారు. ఎమ్మెల్యే సిఫారసు ఉంటేనే అధికారులు నిధులు కేటాయిస్తామంటున్నారని ఎమ్మెల్యే దృష్టికి  శరత్‌ తీసుకెళ్లారు. అదే సమయంలో ఆకోలి గ్రామ సర్పంచ్‌ వాణి భర్త కేశవ్‌ అడ్డుతగిలారు. దీంతో శరత్‌, కేశవ్‌ల మధ్య వాగ్వాదం చోటుచేసుకుంది. ఎమ్మెల్యే వెళ్లిపోయిన తర్వాత తెరాస, భాజపా శ్రేణులు పరస్పరం వాగ్వాదానికి దిగడంతో కాసేపు ఉద్రిక్తత నెలకొంది. అనంతరం మండలాధ్యక్షుడు మార్చెట్టి గోవర్ధన్‌ సహా పోలీసుల జోక్యంతో వివాదం సద్దుమనిగింది.