Priyanka Gandhi: యూపీ ఎన్నికల్లో ఒంటరిగానే పోటీ: ప్రియాంకా గాంధీ

లఖ్‌నవూ: ఉత్తరప్రదేశ్‌లో వచ్చే ఏడాది జరగనున్న అసెంబ్లీ ఎన్నికల్లో కాంగ్రెస్‌ పలు పార్టీలతో పొత్తుపెట్టుకోనుంది అని వస్తున్న ఊహాగానాలకు ఆ పార్టీ జనరల్‌ సెక్రెటరీ ప్రియాంకా గాంధీ తెరదించారు. తాము ఏ పార్టీతోనూ పొత్తు పెట్టుకోవడం లేదని, ఒంటరిగానే పోటీ చేస్తున్నట్లు స్పష్టం చేశారు. ఒంటరిగా పోటీ చేసి గెలిచే సత్తా తమ పార్టీకి ఉందని ధీమా వ్యక్తం చేశారు. బులంద్‌షహర్‌లో కాంగ్రెస్‌ నిర్వహిస్తున్న ‘ప్రతిజ్ఞ సమ్మేళన్‌-లక్ష్య 2022’ కార్యక్రమంలో పాల్గొన్న ప్రియాంక మాట్లాడారు. ‘ఉత్తరప్రదేశ్‌లోని అన్ని అసెంబ్లీ స్థానాలకు కాంగ్రెస్ కార్యకర్తలను మాత్రమే నామినేట్ చేస్తాం. కాంగ్రెస్‌ గెలవాలనుకుంటే ఒంటరిగానే గెలుస్తుంది’ అని పేర్కొన్నారు.

ఈ ఎన్నికల్లో కాంగ్రెస్ పార్టీ సీఎం అభ్యర్థిగా ప్రియాంకా గాంధీ పేరును ప్రకటించే అవకాశాలున్నట్లు తెలుస్తోంది. ఆమె నేతృత్వంలోనే కాంగ్రెస్‌.. యూపీ ఎన్నికలకు వెళ్లనున్నట్లు ఆ పార్టీ సీనియర్‌ నేత, కేంద్ర మాజీ మంత్రి సల్మాన్‌ ఖుర్షీద్‌ గతంతోనే వెల్లడించారు. ఇదిలా ఉండగా.. 2017 యూపీ అసెంబ్లీ ఎన్నికల్లో భాజపా అఖండ విజయం సాధించిన విషయం తెలిసిందే. ఆ రాష్ట్రంలో 403 శాసనసభ నియోజకవర్గాలుండగా.. భాజపా 312 చోట్ల జయకేతనం ఎగురవేసింది. ఆ తర్వాత సమాజ్‌వాదీ పార్టీ 47, బహుజన్‌సమాజ్‌ పార్టీ 19 స్థానాల్లో గెలిచింది. కాంగ్రెస్‌కు కేవలం 7 సీట్లు మాత్రమే దక్కాయి.