Raghurama: ఇది తెలుగువారికి జరిగిన అవమానం!

దిల్లీ: తెదేపా అధినేత చంద్రబాబు సతీమణి భువనేశ్వరికి జరిగిన అవమానం భూదేవికి జరిగినట్లే అని వైకాపా ఎంపీ రఘురామకృష్ణరాజు అన్నారు. వివేకా హత్యపై మాట్లాడకుండా పక్కదారి పట్టించడం సరికాదన్నారు. నిన్న ఏపీ అసెంబ్లీలో జరిగిన ఘటనపై రఘురామ స్పందించారు. దిల్లీలో ఆయన మీడియాతో మాట్లాడారు. ‘‘మీ ఆడవాళ్ల గురించి ఇలా మాట్లాడితే ఏం చేస్తారు?రోజులన్నీ మీవి కావు.. అది గమనించి నడుచుకోవాలి. నందమూరి కుటుంబం ఎంత ఆవేదన పడిందో చూశాం. ఎన్టీఆర్‌ జాతి సంపద, కుటుంబ పెద్దగా భావించాలి. ఇది ఎన్టీఆర్‌ కుటుంబ సమస్య కాదు.. తెలుగు వారికి జరిగిన అవమానం. ఈ ఘటనపై ప్రతిఒక్కరూ స్పందించాలి. మహిళలంతా ఏకమై ముందుకు కదలాలి’ అని పిలుపునిచ్చారు.