AP News: నా ట్రాక్టర్‌నే సీజ్‌ చేస్తారా?: పోలీస్‌స్టేషన్‌లో వైకాపా నేత వీరంగం

అమరావతి: ఇసుక ట్రాక్టర్ స్వాధీనం చేసుకున్నందుకు వైకాపా నాయకుడు పోలీస్‌స్టేషన్‌ ప్రాంగణంలో వీరంగం సృష్టించాడు. గతంలో జరిగిన ఈ ఘటనకు సంబంధించిన ఓ వీడియో సోషల్‌ మీడియాలో వైరల్‌ అవుతోంది. గుంటూరు జిల్లా అమరావతి వాసి లక్ష్మీనారాయణకు చెందిన ఇసుక ట్రాక్టర్‌ను పోలీసులు స్వాధీనం చేసుకున్నారు. అధికార పార్టీలో ఉన్న తన వాహనాన్నే సీజ్‌ చేస్తారా అంటూ లక్ష్మీనారాయణ హల్‌చల్‌ చేశాడు. మద్యం మత్తులో పోలీస్‌స్టేషన్‌కు వెళ్లి నేలపై దొర్లుతూ హంగామా సృష్టించాడు. పోలీసులు తనను అనుమానించారని.. దీనికంటే చనిపోవడమే మేలంటూ కేకలు వేశాడు. పోలీసులు సముదాయించినా వినిపించుకోకుండా వారిపై దూషణలకు దిగాడు. ఈ ఘటన జరిగి నెలరోజులు గడిచినట్లు పోలీసులు చెబుతున్నారు.