Mamata Banerjee: కేంద్రం, దీదీ మధ్య ‘తుపాను’ చిచ్చు  

ప్రధాన కార్యదర్శిని రిలీవ్‌ చేయలేమన్న మమత

కేంద్రం ఉత్తర్వులను వెనక్కి తీసుకోవాలని మోదీకి లేఖ

కోల్‌కతా: యస్‌ తుపాను సమీక్షా సమావేశం..మరోసారి కేంద్రం, దీదీ మధ్య వివాదానికి ఆజ్యం పోసింది. ఈ నేపథ్యంలో బెంగాల్ ప్రభుత్వ కార్యదర్శిని తక్షణమే రిలీవ్ చేయాలంటూ రెండు రోజుల క్రితం కేంద్రం ఆదేశించగా..పశ్చిమ బెంగాల్ ముఖ్యమంత్రి మమతా బెనర్జీ తన శైలిలో ఆ ఆదేశాలను ధిక్కరించారు. ఈ క్లిష్ట సమయంలో ఆయన్ను రిలీవ్ చేయడం కుదరదని చెప్తూ సోమవారం ప్రధాని నరేంద్ర మోదీకి లేఖ రాశారు. కేంద్ర ప్రభుత్వ ఏకపక్ష ఉత్తర్వులతో తాను షాక్‌కు గురయ్యాయని, అంతే ఆశ్చర్యపోయానని ఆ లేఖలో వ్యాఖ్యానించారు. రాజ్యాంగ విరుద్ధమైన ఆ ఉత్తర్వులను వెంటనే ఉపసంహరించుకోవాలని విజ్ఞప్తి చేశారు. 

‘కరోనా మహమ్మారి వల్ల పశ్చిమ బెంగాల్ తీవ్రంగా ప్రభావితమైంది. యస్‌ తుపానుతో మరింత బీభత్సం చోటుచేసుకుంది. ఈ క్లిష్ట సమయంలో బెంగాల్ ప్రభుత్వం ప్రధాన కార్యదర్శి (ఆలాపన్ బంధోపాధ్యాయ్‌)ని రిలీవ్ చేయలేదు’ అంటూ ఆ లేఖలో వెల్లడించారు. మే 31 నాటికి బంధోపాధ్యాయ్‌కు 60 ఏళ్లు నిండుతాయి. నిజానికి ఈ రోజే పదవీవిమరణ చేయాల్సి ఉండగా.. ఆయన సేవలను మరో మూడు నెలల పాటు పెంచుతూ గత సోమవారం మమత ఆదేశాలు జారీ చేశారు. కరోనాను ఎదుర్కోవడంలో ఆయనకున్న అనుభవం దృష్ట్యా సేవలపెంపుపై ఈ నెల 12న మమత ప్రధానికి లేఖ రాశారు. ఆయన పదవీ కాలం పొడిగించేందుకు రాష్ట్రం చేసిన అభ్యర్థనను కేంద్రం అంగీకరించిందని ఈ సందర్భంగా లేఖలో ఆమె గుర్తు చేశారు. దాంతో తాజా ఉత్తర్వులు చట్టాలను ఉల్లంఘించేవిగా, ప్రజా ప్రయోజనాలకు విరుద్ధంగా ఉన్నాయని ఆమె ఆరోపించారు. ‘ప్రజా ప్రయోజనంతో ముడిపడి ఉన్న ఈ ఉత్తర్వులను ఉపసంహరించుకోవాలని విజ్ఞప్తి చేస్తున్నాను. ఈ ఆదేశాల వెనక కలైకుండాలో ప్రధాని మోదీతో జరిగిన సమావేశానికి ఏదైనా సంబంధం ఉందా? అదే కారణం అయితే.. చాలా దురదృష్టకరం. ఈ నిర్ణయం ప్రజా ప్రయోజనాలను బలి పెట్టడం కిందికే వస్తుంది’ అని ఆమె లేఖలో వ్యాఖ్యానించారు.  

యస్ ప్రభావిత ప్రాంతాల్లో ప్రధాని మోదీ పర్యటించి, ఆయా రాష్ట్రాల్లో సమీక్షా సమావేశాలు నిర్వహించారు. ఈ క్రమంలో బెంగాల్‌లో జరిపిన సమావేశానికి మమతతో కలిసి ప్రధాన కార్యదర్శి కాస్త ఆలస్యంగా వచ్చారు. ఆ వెంటనే ఆయన దిల్లీలో రిపోర్టు చేయాలని కేంద్రం నుంచి ఆదేశాలు వచ్చాయి. దాంతో ఈ ఉత్తర్వుల వెనక సమావేశ ప్రభావం ఉందేమోనన్న చర్చ జరుగుతోంది.