The Great Khali: భాజపాలోకి ‘ది గ్రేట్‌ ఖలీ’.. ప్రధానిపై ప్రశంసలు

దిల్లీ: ‘ది గ్రేట్‌ ఖలీ’గా పేరుపొందిన వరల్డ్ రెజ్లింగ్ ఎంటర్‌టైన్‌మెంట్ (డబ్ల్యూడబ్ల్యూఈ) స్టార్‌ దలీప్‌ సింగ్‌ రానా గురువారం భాజపాలో చేరారు. దిల్లీలోని పార్టీ ప్రధాన కార్యాలయంలో నిర్వహించిన కార్యక్రమంలో కాషాయ కండువా కప్పుకొన్నారు. భాజపా విధానాలకు ఆకర్షితుడినై ఇందులో చేరినట్లు ఆయన ఈ సందర్భంగా వెల్లడించారు. ‘భాజపాలో చేరినందుకు సంతోషంగా ఉంది. దేశం కోసం ప్రధాని నరేంద్ర మోదీ చేస్తున్న కృషి ఆయన్ను సరైన స్థానంలో నిలబెడుతోంది. కాబట్టి.. దేశాభివృద్ధి కోసం ఆయన పాలనలో నేనెందుకు భాగం కాకూడదని అనిపించింది’ అని చెప్పుకొచ్చారు. పంజాబ్ అసెంబ్లీ ఎన్నికలకు పది రోజుల ముందు ఆయన కమలం గూటికి చేరుకోవడం గమనార్హం.

ప్రొఫెషనల్ రెజ్లింగ్‌లోకి అడుగుపెట్టక ముందు ఖలీ.. పంజాబ్‌ పోలీస్ అధికారిగా పని చేసిన విషయం తెలిసిందే. సాగు చట్టాలకు వ్యతిరేకంగా దిల్లీ సరిహద్దుల్లో చేపట్టిన రైతు నిరసనలకూ మద్దతు తెలిపారు. ఆ చట్టాలతో సామాన్యులు సైతం ఇబ్బంది పడతారని.. ఈ నేపథ్యంలో దేశవాసులంతా అన్నదాతలకు అండగా నిలవాలని పిలుపునిచ్చారు. ఇదిలా ఉండగా.. గతేడాది నవంబర్‌లో ఆప్‌ అధినేత అరవింద్‌ కేజ్రీవాల్‌.. ఖలీని కలిశారు. పంజాబ్‌ ఎన్నికల్లో ఆప్‌కే ఆయన మద్దతు ఇస్తున్నట్లు వెల్లడించారు. కానీ, తాజాగా ఆయన.. కమల దళంలో చేరారు. పంజాబ్‌లో ఫిబ్రవరి 20న ఎన్నికలు జరగనుండగా, మార్చి 10న ఓట్ల లెక్కింపు చేపట్టనున్నారు.