Revanth Reddy: పోలీసుల అదుపులో టీపీసీసీ అధ్యక్షుడు రేవంత్‌రెడ్డి

హైదరాబాద్‌: టీపీసీసీ అధ్యక్షుడు రేవంత్‌రెడ్డిని పోలీసులు అదుపులోకి తీసుకున్నారు. ఈ ఉదయం జూబ్లీహిల్స్‌లోని ఆయన ఇంటికి వెళ్లి తమ వాహనంలో ఎక్కించుకొని తీసుకెళ్లారు. తొలుత లంగర్‌హౌస్‌ పీఎస్‌ వైపు తీసుకెళ్లిన పోలీసులు.. చివరకు గోల్కొండ పీఎస్‌కు తరలించారు. రాష్ట్రంలో ఉద్యోగాల భర్తీ చేయకపోవడం సహా, ఇచ్చిన హామీలు అమలు చేయలేదని ఇటీవల రేవంత్‌ అన్నారు. అందుకు ప్రతిగా కేసీఆర్‌ పుట్టినరోజు సందర్భంగా ఇవాళ వివిధ రకాలుగా నిరసనలు తెలిపాలని యువజన కాంగ్రెస్‌కు ఆయన సూచించారు. ఈ నేపథ్యంలో రేవంత్‌ను అదుపులోకి తీసుకున్నట్లు సమాచారం.

కేసీఆర్‌ సొంత రాజ్యాంగం అమలు చేస్తున్నారు: కాంగ్రెస్‌

రేవంత్‌ పోలీసులు అదుపులోకి తీసుకోవడంపై కాంగ్రెస్‌ నేతలు మండిపడ్డారు. ఇది అక్రమం, అప్రజాస్వామికమని పీసీసీ కార్యనిర్వాహక అధ్యక్షుడు మహేశ్‌కుమార్‌, ఉపాధ్యక్షుడు మల్లు రవి అన్నారు. రాష్ట్రంలో నిర్బంధకాండ అమలవుతోందన్నారు. సీఎం కేసీఆర్‌ సొంత రాజ్యాంగం అమలు చేస్తున్నారని మండిపడ్డారు. విపక్ష నేతలకు మాట్లాడే హక్కు లేకుండా అడ్డుపడుతున్నారని వారు ఆగ్రహం వ్యక్తం చేశారు.