Telangana News: పార్లమెంట్‌లో తెరాస ఎంపీల వాయిదా తీర్మానం.. వాకౌట్‌

దిల్లీ: తెలంగాణలో ధాన్యం కొనుగోళ్ల విషయంలో తెరాస, కేంద్ర ప్రభుత్వం మధ్య వివాదం కొనసాగుతూనే ఉంది. ఈ క్రమంలో ధాన్యం సేకరణపై చర్చించాలని తెరాస ఎంపీలు పార్లమెంట్‌ ఉభయసభల్లో పట్టుబట్టారు. అనంతరం లోక్‌సభ, రాజ్యసభల్లో ఎంపీలు వాయిదా తీర్మానం నోటీసులిచ్చారు. ఈ తీర్మానాన్ని లోక్‌సభ స్పీకర్‌ ఓం బిర్లా తిరస్కరించారు. ధాన్యం సేకరణపై చర్చ చేపట్టకపోవడంతో ఉభయసభల నుంచి ఎంపీలు వాకౌట్‌ చేశారు. అంతకముందు కేంద్ర ప్రభుత్వ తీరుకు నిరసనగా లోక్‌సభలో ఎంపీలు ఆందోళన చేపట్టారు. అనంతరం పార్లమెంట్‌ ఆవరణలోని గాంధీ విగ్రహం వద్ద ఫ్లకార్డులతో నిరసన తెలిపారు. తెలంగాణలో ధాన్యం కొనుగోలు చేయాల్సిందే అని డిమాండ్‌ చేశారు.