UP Polls: మంత్రి కొడుకు డబ్బులు పంచుతున్న వీడియో వైరల్‌.. ఈసీ సీరియస్‌!

బులంద్‌షెహర్‌: యూపీలో ఎన్నికల సమయం దగ్గరపడుతున్న వేళ ప్రజల్ని తమవైపు ఆకర్షించి ఓట్లు కొల్లగొట్టేందుకు రాజకీయ పార్టీల ప్రయత్నాలు ముమ్మరం చేశాయి. ఈ నేపథ్యంలో యూపీ మంత్రి, ఈ ఎన్నికల్లో శిఖర్‌పూర్ నుంచి భాజపా తరఫున బరిలో నిలిచిన అనిల్‌ శర్మ తనయుడు ప్రజలకు డబ్బుల పంచుతున్న వీడియో ఒకటి వైరల్‌గా మారింది. దీంతో ఎన్నికల సంఘం అధికారులు సీరియస్‌ అయ్యారు. ఈ ఘటనపై 24గంటల్లోగా వివరణ ఇవ్వాలంటూ మంత్రిని శిఖర్‌పూర్‌ రిటర్నింగ్‌ అధికారి కోరారు. మంత్రి శర్మ తనయుడు కుష్‌ తన వాహనం వద్ద డప్పుల చప్పుళ్ల మధ్య ప్రజలకు రూ.100 నోట్లు పంచుతున్నట్టుగా ఈ వీడియోలో రికార్డయి ఉంది. దీంతో రిటర్నింగ్‌ అధికారి మంత్రి శర్మకు నోటీసులు ఇచ్చారు. ఆయనకు చెందిన పార్టీ వారు ఆ ప్రాంతంలో డబ్బులు పంచుతున్నారనీ.. ఇది ప్రాథమికంగా ఎన్నికల ప్రవర్తనా నియమావళిని ఉల్లంఘించడమేనని పేర్కొన్నారు. ఈ అంశంపై 24గంటల్లోగా లిఖితపూర్వక వివరణ ఇవ్వాలంటూ మంత్రికి నోటీసులు జారీచేశారు.