AP News: మరో 20ఏళ్ల పాటు మంచి పరిపాలన అందిస్తాం: విజయసాయిరెడ్డి

విశాఖ: మున్సిపల్‌ ఎన్నికల్లో ప్రజలు ఇచ్చిన తీర్పు 2024లో వైకాపా విజయానికి చిహ్నమని ఆ పార్టీ ఎంపీ విజయసాయి రెడ్డి అన్నారు. మున్సిపల్‌ ఎన్నికల్లో వైకాపా ఘన విజయం తర్వాత విశాఖలో ఏర్పాటు చేసిన మీడియా సమావేశంలో ఆయన మాట్లాడుతూ... తెలుగుదేశం పార్టీ పతనం మొదలైందన్నారు. చంద్రబాబు రాజకీయ ప్రస్థానానికి తెరపడిందని, భవిష్యత్‌లో ఎన్నికల్లో పోటీ చేయడానికి కూడా అనర్హుడని విమర్శించారు. 2019లో చంద్రబాబు పాలనలో ఆయన కుమారుడు ఓటమిపాలయ్యారని గుర్తు చేశారు. సొంత నియోజకవర్గంలోనే ఓడిపోయిన చంద్రబాబుకు దౌర్జన్యాలు, అక్రమాలని మాట్లాడే అర్హత లేదని వ్యాఖ్యానించారు. భవిష్యత్‌లో చంద్రబాబు ఆంధ్రప్రదేశ్‌కు వచ్చే అర్హత కూడా లేదని విమర్శించారు. జగన్‌ సుపరిపాలనను ప్రజలు అర్థంచేసుకున్నారని, మరో 20 ఏళ్ల పాటు మంచి పాలన అందిస్తామని విజయసాయిరెడ్డి చెప్పారు.