Sharad Pawar: ప్రత్యామ్నాయం మేమేనని నిరూపించుకోవాలి: శరద్‌ పవార్‌

ప్రధాని అభ్యర్థి పేరు ముఖ్యం కాదు

దిల్లీ: భాజపాకు నిజమైన ప్రత్యామ్నాయం తామేనని ప్రతిపక్షాలు నిరూపించుకోవాల్సి ఉందని, ప్రధాని అభ్యర్థి పేరు అంత ముఖ్యం కాదని ఎన్సీపీ అధినేత శరద్‌ పవార్‌ అభిప్రాయపడ్డారు. బిహార్‌ ముఖ్యమంత్రి నీతీశ్‌ కుమార్‌ పట్నాలో ఈ నెల 23వ తేదీన నిర్వహించనున్న సమావేశానికి హాజరవుతున్నానని చెప్పారు. శనివారం దిల్లీలో పవార్‌ మీడియాతో మాట్లాడారు. ‘ప్రధాని పేరు ప్రకటించడం అంత ముఖ్యం కాదు. 1977లోనూ ప్రధాని అభ్యర్థిగా ఎవరినీ ముందుగా ప్రకటించలేదు. జనతా పార్టీ గెలిచాక మొరార్జీ దేశాయ్‌ ప్రధాని అయ్యారు. అప్పుడు సాధ్యమైంది ఇప్పుడెందుకు కాదు’ అని పవార్‌ పేర్కొన్నారు. భాజపాపై ఉమ్మడి అభ్యర్థిని నిలిపే అంశంపై 23నాటి సమావేశంలో చర్చిస్తామని తెలిపారు.