ys jagan: ‘కళ్లు మూసుకుంటే ఐదేళ్లు అయిపోయాయి..’ జగన్‌ కామెంట్స్‌ వైరల్‌

YS Jagan: పార్టీ ఎమ్మెల్సీలతో జరిగిన సమావేశంలో వైఎస్‌ జగన్‌ మాట్లాడిన తీరు సోషల్‌ మీడియాలో ట్రోలింగ్‌ అవుతోంది.

Updated : 13 Jun 2024 18:21 IST

అమరావతి: అసెంబ్లీ ఎన్నికల్లో ఓటమి తర్వాత వైఎస్‌ జగన్‌ (YS Jagan) మాట్లాడుతున్న తీరు చూసి, అందరూ నవ్వుకుంటున్నారు. సామాజిక మాధ్యమాల వేదికగా అయితే, మామూలుగా ట్రోలింగ్ చేయడం లేదు. తాజాగా వైఎస్‌ఆర్‌సీపీ ఎమ్మెల్సీలతో తన క్యాంపు కార్యాలయంలో జగన్‌ సమావేశమయ్యారు. ఈసందర్భంగా ఆయన మాట్లాడిన మాటలు విని అక్కడున్నవారే ఒకరి ముఖాలు ఒకరు చూసుకున్నారు.

ఈ సమావేశంలో జగన్‌ మాట్లాడుతూ.. ‘‘ప్రజల మన్ననలు పొందిన తర్వాతే ఎన్నికలకు వెళ్లాం. ఈ ఎన్నికల్లో ఏమైందో తెలియదు. కళ్లు మూసుకుంటే ఐదేళ్లు అయిపోయాయి. మళ్లీ 2024 నుంచి 2029 వరకు కళ్లు మూసుకుంటే ఎన్నికలు వచ్చేస్తాయి. మనం గుర్తు పెట్టుకోవాల్సిన అంశం ఏమిటంటే.. సినిమాలో ఫస్ట్‌ ఆఫ్‌ మాత్రమే అయింది’’ అని జగన్‌ అన్నారు. ప్రస్తుతం ఇందుకు సంబంధించిన వీడియో సామాజిక మాధ్యమాల్లో వైరల్‌ అవుతోంది.

‘అలా కళ్లు మూసుకుని ఐదేళ్లు గడపబట్టే, పాలన లేక ఆంధ్రప్రదేశ్‌ మటాష్‌ అయిపోయింది’, ‘కళ్లు మూసుకుంటేనే మీకు 11 సీట్లు వచ్చాయి’, ‘ఐప్యాక్‌ స్క్రిప్ట్‌ లేకపోతే మాటలు ఇలాగే ఉంటాయి’, ‘2049 వరకూ కళ్లు మూసుకుని ఉండాలి’, ‘అన్నా నువ్వు నిజంగానే సీఎంగా చేశావా’, ‘2060 వరకూ కళ్లు తెరవద్దు అన్నా’, ‘మేమూ అదే చెప్పాం సర్‌.. మీరు ఇక కళ్లు మూసుకుని ప్రశాంతంగా పడుకోండి’, ‘కళ్లు మూసుకోవడం కాదన్నా, ఎందుకు ఓడిపోయామో కళ్లు తెరిచి బూతులు మాట్లాడకుండా పోరాటం చేయండి’, ‘పవర్‌.. పవర్‌.. పవర్‌.. వచ్చే ఎన్నికల గురించి ఇప్పుడే మాట్లాడుతున్నావా జగనన్నా. అవి వచ్చేలోపు ప్రజలకు ఏం చేయాలో దాని గురించి ఆలోచించవచ్చు కదా’ అంటూ కామెంట్లు, మీమ్స్‌తో నెటిజన్లు విరుచుకుపడుతున్నారు.


Tags :

Trending

గమనిక: ఈనాడు.నెట్‌లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.

మరిన్ని