YS Sharmila: లోటస్‌పాండ్‌లోని నివాసంలో దీక్ష కొనసాగిస్తున్న షర్మిల

హైదరాబాద్‌: ఆరేళ్ల చిన్నారి హత్యాచార ఘటనకు నిరసగా వైతెపా అధ్యక్షురాలు వైఎస్‌ షర్మిల చేపట్టిన దీక్షను పోలీసులు భగ్నం చేశారు. నగరంలోని సైదాబాద్‌ పరిధి సింగరేణి కాలనీలో ఆరేళ్ల చిన్నారి హత్యాచార ఘటన తీవ్ర కలకలం రేపిన సంగతి తెలిసిందే. షర్మిల బుధవారం బాలిక కుటుంబాన్ని పరామర్శించారు. అనంతరం ఈ ఘటనపై తెలంగాణ సీఎం స్పందించే వరకు కదిలేది లేదని అక్కడే దీక్షకు కూర్చున్నారు. దీంతో బుధవారం అర్ధరాత్రి దాటాక పోలీసులు రంగప్రవేశం చేసి వైతెపా శ్రేణులను చెదరగొట్టి షర్మిల దీక్షను భగ్నం చేశారు. అనంతరం దీక్షాస్థలి నుంచి షర్మిలను లోటస్‌పాండ్‌లోని ఆమె నివాసానికి తరలించారు. అయితే షర్మిల తన నివాసంలోనూ దీక్ష కొనసాగిస్తున్నారు. ప్రభుత్వం స్పందించి బాధిత కుటుంబానికి న్యాయం చేసే వరకు దీక్ష ఆపేది లేదని ఆమె స్పష్టం చేశారు.