Vijayasai Reddy: అంతా ఆయన వల్లే.. జైరాం రమేశ్‌పై ఎంపీ విజయసాయి విసుర్లు

దిల్లీ: కాంగ్రెస్‌ ఎంపీ జైరాం రమేశ్‌పై వైకాపా ఎంపీ విజయసాయిరెడ్డి విమర్శలు చేశారు. ఏపీ విభజన చట్టాన్ని ఆయన తప్పుల తడకగా రాయడం వల్లే ఎన్డీయే ప్రభుత్వం విభజన హామీలు అమలు చేయడంలేదన్నారు.  ఒడిశాలోని గనుల శాఖ నుంచి రైల్వే శాఖకు బొగ్గు సరఫరా చేయకపోవడం వల్లే విశాఖ స్టీల్‌ప్లాంట్‌లో రెండు ఫర్నేస్‌లు మూతపడ్డాయన్నారు. ‘‘దురదృష్టవశాత్తూ నా స్నేహితుడు జైరాం రమేశ్‌ ఏపీ పునర్‌వ్యవస్థీకరణ చట్టాన్ని తప్పుల తడకగా రూపొందించారు. ‘Shall’ అని ఉండాల్సిన ప్రతీ చోటా ‘May’ అనే పదాన్ని ఉపయోగించారు. దీన్ని అవకాశంగా తీసుకున్న ఎన్డీయే ప్రభుత్వం విశాఖ కేంద్రంగా రైల్వేజోన్‌ ఏర్పాటు చేయడం లేదు. దురదృష్టవశాత్తు జైరాం రమేశ్‌ విస్మరించిన అంశాల వల్ల ఏపీ మూల్యం చెల్లించడానికి వీల్లేదు. ఈ అంశాన్ని పరిగణనలోకి తీసుకొని విశాఖ కేంద్రంగా రైల్వేజోన్‌ ఏర్పాటు చేయాలి’’ అని కేంద్రాన్ని కోరారు.