Prince Charles: ఖతర్‌ నుంచి నగదు రూపంలో విరాళాలు తీసుకున్న ప్రిన్స్‌ ఛార్లెస్‌

లండన్‌: బ్రిటన్‌ యువరాజు ఛార్లెస్‌ గతంలో 30 లక్షల యూరోల (సుమారు రూ.24.79 కోట్లు) మేర విరాళాలను ఖతర్‌ నుంచి నగదు రూపంలో సూట్‌కేసులో స్వీకరించారని ‘ది సండే టైమ్స్‌’ ఒక కథనం వెలువరించింది. ఖతర్‌ మాజీ ప్రధాని షేక్‌ హమద్‌ బిన్‌జసిమ్‌ బిన్‌ జబెర్‌ అల్‌థానీ నుంచి నోట్ల కట్టలుగా ఈ మొత్తాన్ని ఛార్లెస్‌ తీసుకున్నట్లు తెలిపింది. మూడు విడతలుగా ఈ మొత్తం ‘ప్రిన్స్‌ ఆఫ్‌ వేల్స్‌ ఛారిటబుల్‌ ఫండ్‌’ (పీడబ్ల్యూసీఎఫ్‌)లో జమ అయిందనీ, రాజ కుటుంబానికి సన్నిహితంగా ఉండేవారి ప్రాజెక్టులకు దీని నుంచి గ్రాంటు అందుతుంటుందని వివరించింది. ఈ చెల్లింపులు అక్రమమని మాత్రం కథనం పేర్కొనలేదు. దాత ఇష్టం మేరకు నగదు రూపంలో విరాళాన్ని తీసుకున్నట్లు పీడబ్ల్యూసీఎఫ్‌ తెలిపింది.