కరోనాపై మన పోరు అపూర్వం

ప్రపంచంలో అతిపెద్ద వ్యాక్సిన్ల కార్యక్రమం భారత్‌ది
జాగ్రత్తలు పాటించడం దేశ కర్తవ్యంగా మారింది
జాతినుద్దేశించి చేసిన ప్రసంగంలో రాష్ట్రపతి కోవింద్‌

దిల్లీ: కరోనా మహమ్మారిపై పోరులో భారత్‌ సాగించిన ప్రస్థానం అపూర్వమని రాష్ట్రపతి రామ్‌నాథ్‌ కోవింద్‌ చెప్పారు. శాస్త్రవేత్తలు, నిపుణులు చెబుతున్న జాగ్రత్తల్ని పాటించడం దేశ పవిత్ర కర్తవ్యంగా మారిందనీ, ఈ సంక్షోభమంతా ముగిసిపోయేవరకు దీనిని కొనసాగించాలని పిలుపునిచ్చారు. బుధవారం జరగనున్న గణతంత్ర దినోత్సవాన్ని పురస్కరించుకుని మంగళవారం సాయంత్రం ఆయన జాతినుద్దేశించి ప్రసంగించారు. ‘‘కరోనా వచ్చిన మొదటి ఏడాదే సదుపాయాలు పెంచుకున్నాం. రెండో ఏడాది వ్యాక్సిన్లు తయారు చేసుకుని, ప్రపంచంలోనే అతిపెద్ద టీకాల కార్యక్రమాన్ని ప్రారంభించుకున్నాం. ఇతర దేశాలకు సాయమందించాం. అంతర్జాతీయంగా ప్రశంసలు పొందాం. ప్రాణాలను పణంగా పెట్టి వైద్య సిబ్బంది అలుపెరుగని సేవలు అందించారు. రెండేళ్లయినా కరోనాతో పోరాటం ఇంకా అంతం కాలేదు. ప్రజలు అప్రమత్తంగా ఉండాలి. తగిన జాగ్రత్తలు పాటించాలి. కరోనాకు రెండు టీకాలు రూపొందించడం దేశానికి గర్వకారణం. కఠిన సమయంలోనూ దేశ ప్రజలు పోరాటస్ఫూర్తి చాటారు. కరోనా ప్రభావం నుంచి దేశ ఆర్థిక వ్యవస్థ క్రమంగా కోలుకుంటోంది. యువత స్టార్టప్‌లతో అద్భుతాలు సృష్టిస్తోంది. బలమైన దేశం ఇప్పుడు ఆవిర్భవిస్తోంది. ఐక్యతను, ఒకే దేశం అనే స్ఫూర్తిని ప్రతిబింబించేలా ఏటా గణతంత్ర దినోత్సవం జరుపుకొంటాం. కరోనా కారణంగా ఈసారి వేడుకలు నిరాడంబరంగా జరుగుతున్నప్పటికీ.. స్ఫూర్తి మాత్రం ఎప్పటిలాగే బలంగా ఉంది. మనందరిలో ఉమ్మడిగా ఉన్న భారతీయతను పండగలా జరుపుకొనేందుకు గణతంత్ర వేడుక ఒక తరుణం’’ అని రాష్ట్రపతి చెప్పారు. దేశ సరిహద్దుల్ని, దేశంలో శాంతిభద్రతల్ని కాపాడడంలో సైనికులు, పోలీసులు చేస్తున్న కృషిని ఆయన కొనియాడారు.