Srilanka Crisis: అన్న రాజీనామా కోరిన తమ్ముడు?

ప్రధాని పదవిని వీడబోనన్న మహింద రాజపక్స

కొలంబో: తీవ్ర ఆర్థిక సంక్షోభంలో చిక్కుకొని అల్లాడుతున్న శ్రీలంకలో రాజకీయాలు ఉత్కంఠగా మారుతున్నాయి. తన అన్న, ప్రధానమంత్రి మహింద రాజపక్సతో రాజీనామా చేయించి.. నూతన ప్రభుత్వాన్ని ఏర్పాటుచేసేందుకు తాను సిద్ధమని దేశాధ్యక్షుడు గొటబాయ రాజపక్స తెలిపినట్లు అక్కడి మీడియాలో తాజాగా వార్తలొచ్చాయి. సంకీర్ణ ప్రభుత్వంలోని అన్ని పార్టీల నేతలకు గొటబాయ ఈ మేరకు లేఖ రాసినట్లు అవి పేర్కొన్నాయి. ఈ వార్తలను మహింద బుధవారం తోసిపుచ్చారు. తాను రాజీనామా చేసే ప్రసక్తే లేదని పునరుద్ఘాటించారు. పదవి నుంచి తప్పుకోవాలంటూ దేశాధ్యక్షుడు తనను కోరలేదనీ స్పష్టం చేశారు. అవసరమైతే తన నేతృత్వంలోనే కొత్త ప్రభుత్వాన్ని ఏర్పాటుచేసేందుకూ ఆస్కారమున్న సంగతిని గుర్తుచేశారు. గొటబాయతో తనకు విభేదాలేవీ లేవని కూడా చెప్పారు. ఈ నేపథ్యంలో సంకీర్ణ ప్రభుత్వంలోని అన్ని పార్టీలతో దేశాధ్యక్షుడు శుక్రవారం భేటీ కానుండటం ప్రాధాన్యం సంతరించుకుంది.