గుజరాత్‌లో ఆకాశం నుంచి పడిన లోహపు బంతులు

పరిశోధన కోసం ఇస్రోకు పంపిన అధికారులు

అహ్మదాబాద్‌: ఇటీవల గుజరాత్‌ లోని కొన్ని గ్రామాల్లో ఆకాశం నుంచి నాలుగు గోళాకార లోహపు వస్తువులు ఊడిపడ్డాయి. ఒకటిన్నర అడుగుల వ్యాసంలో ఉన్న ఈ వస్తువులు ఈ నెల 12, 13 తేదీల్లో ఆనంద్‌ జిల్లాలోని దగ్జిపురా, ఖంభోలాజ్‌, రాంపుర్‌, ఖేడా జిల్లా భూమేల్‌ గ్రామాల్లో ఈ శకలాలు పడినట్లు ఆనంద్‌ జిల్లా డిప్యూటీ పోలీసు సూపరింటెండెంట్‌ బీడీ జడేజా చెప్పారు. వీటి వల్ల ఎవరికీ హాని జరగలేదని పేర్కొన్నారు. అదేవిధంగా వడోదర జిల్లాలోని సావ్లి గ్రామంలోనూ ఇలాంటి శకలాలే కనిపించాయని తెలిపారు. పరిశీలన నిమిత్తం వీటిని భారత అంతరిక్ష పరిశోధన సంస్థ(ఇస్రో)కు, భౌతిక శాస్త్ర పరిశోధనశాలకు పంపినట్లు జడేజా తెలిపారు. మరో వైపు ఈ శకలాలు చైనాకు చెందిన ఛాంగ్‌ జెంగ్‌ 3బి రాకెట్‌ అంతర్భాగాలై ఉండవచ్చునని అమెరికన్‌ ఖగోళవేత్త జోనాథన్‌ మెక్‌ డొవెల్‌ ఈ నెల 12న ట్వీట్‌ చేశారు. రాకెట్‌ భూవాతావరణంలోకి తిరిగి ప్రవేశించేటప్పుడు అవి కింద పడి ఉండవచ్చునని పేర్కొన్నారు.