సీసీఐని అమ్మి ఏం సాధిస్తారు?

కేంద్రంపై ఎమ్మెల్సీ కవిత ధ్వజం

ఈనాడు, హైదరాబాద్‌: తెలంగాణలోని సింగరేణి బొగ్గు గనులు, సిమెంట్‌ కర్మాగారాన్ని విక్రయించి భాజపా ఆధ్వర్యంలోని కేంద్ర ప్రభుత్వం ఏం సాధిస్తుందని తెరాస ఎమ్మెల్సీ కల్వకుంట్ల కవిత ప్రశ్నించారు. లక్షల మందికి జీవనాధారమైన సింగరేణి, ఆదిలాబాద్‌కు జీవనాడిగా ఉన్న సీసీఐ (సిమెంటు కార్పొరేషన్‌ ఆఫ్‌ ఇండియా)ని ప్రోత్సహించాల్సింది పోయి ప్రైవేటుపరం చేసేందుకు కుట్ర చేయడం దారుణమని పేర్కొన్నారు. బుధవారం ఆమె తమ నివాసంలో విలేకరులతో మాట్లాడుతూ ‘‘తెలంగాణలోని సింగరేణి బొగ్గు గనులు, సిమెంట్‌ కర్మాగారాన్ని విక్రయించగా వచ్చే డబ్బును ఈ రాష్ట్రం కోసం వినియోగిస్తారా? ఇది అడిగే దమ్ము రాష్ట్ర భాజపా నాయకులకు ఉందా?’’ అని ప్రశ్నించారు. తెలంగాణకు తీరని ద్రోహం చేస్తున్న భాజపాను అడుగడుగునా నిలదీయాలని ఆమె సూచించారు.