అతివేగం.. మృత్యుపాశం

రోడ్డు ప్రమాద మరణాలకిదే ముఖ్యకారణం
మోర్త్‌-2020 వార్షిక నివేదికలో వెల్లడి

ఈనాడు, హైదరాబాద్‌ : రాష్ట్రంలో రోడ్డు ప్రమాదాలకు అతివేగమే ప్రధాన కారణమవుతోంది. కేంద్ర రవాణా, రహదారుల శాఖ(మోర్త్‌) గత బుధవారం విడుదల చేసిన నివేదిక ఇదే విషయాన్ని తేటతెల్లం చేసింది. 2020 సంవత్సరానికి సంబంధించిన జరిగిన రోడ్డు ప్రమాదాలకు సంబంధించిన ఈ నివేదిక ప్రకారం మొత్తం 19,172 ప్రమాదాల్లో 6,882 మంది మృతిచెందగా.. 18,661 మంది క్షతగాత్రులయ్యారు.ఆ నివేదికలోని మరికొన్ని వివరాలు...

శిరస్త్రాణం లేకపోవడంతో..
ద్విచక్రవాహనాలపై ప్రయాణిస్తూ ప్రమాదానికి గురైన వారిలో 41.33 శాతం మంది శిరస్త్రాణం ధరించకపోవడం వల్లే మరణించారు.

* ప్రాణాలు కోల్పోయిన డ్రైవర్లు : 2004
* మృతిచెందిన పిలియన్‌ రైడర్లు(వెనక కూర్చున్నవారు) : 841
* క్షతగాత్రులైన డ్రైవర్లు : 3837
* గాయపడ్డ పిలియన్‌ రైడర్లు : 2489

మృత్యుమాసం.. డిసెంబరు
ఏడాది మొదటి రెండు.. చివరి రెండు నెలల్లో ఎక్కువ ప్రమాదాలు సంభవించాయి. డిసెంబరులో అత్యధిక ప్రమాదాలు, మరణాలు సంభవించాయి.