Diabetes: మధుమేహ బాధితుల పాదాలకు సాంకేతిక రక్ష

ఈనాడు, బెంగళూరు: మధుమేహ బాధితుల పాదాలను రక్షించేందుకు బెంగళూరులోని భారతీయ విజ్ఞాన సంస్థ (ఐఐఎస్‌సీ) మెకానికల్‌ ఇంజినీరింగ్‌, కర్ణాటక ఇన్‌స్టిట్యూట్‌ ఆఫ్‌ ఎండ్రోక్రానాలజీ రీసెర్చ్‌(కేఐఈఆర్‌) విభాగాలు సంయుక్తంగా ప్రత్యేక పాదరక్షలను రూపొందించాయి. 3-డీ ప్రింటెడ్‌ స్నాపింగ్‌ టెక్నాలజీతో రూపొందించిన ఈ పాదరక్షలు బాధితుల పాదాల్లో మానని గాయాలు మరింత ఇబ్బంది పెట్టకుండా ఉపశమనం కలిగిస్తాయని కేఐఈఆర్‌ పోడియాట్రి విభాగాధిపతి పవన్‌ బెలెహళ్లి సోమవారం ఇక్కడ వెల్లడించారు. డయాబెటిక్‌ పెరిఫెరల్‌ న్యూరోపతి వ్యాధిగ్రస్తులకు ఈ పాదరక్షలు బాగా ఉపయోగపడతాయన్నారు. 3-డీ స్నాపింగ్‌ పాదరక్షలు గాయాలున్న వారు కూడా సాధారణ వ్యక్తుల మాదిరిగానే నడిచేందుకు సహకరిస్తాయని ఐఐఎస్‌సీ మెకానికల్‌ ఇంజినీరింగ్‌ పీహెచ్‌డీ విద్యార్థి ప్రియభ్రత మహారాణ తెలిపారు. సమస్యలున్నవారే కాకుండా సాధారణ వ్యక్తులకూ ఇవి ఉపయోగపడతాయని ఐఐఎస్‌సీ ప్రకటించింది.