Supreme Court: దీర్ఘకాలం కలిసుంటే పెళ్లి జరిగినట్లే: సుప్రీంకోర్టు

వారి సంతానానికి ఆస్తి హక్కులు నిరాకరించకూడదు

దిల్లీ: ఒక మహిళ, పురుషుడు దీర్ఘకాలం పాటు సహజీవనం చేస్తే వారి మధ్య బంధాన్ని వివాహంగానే చట్టం పరిగణిస్తుందని, దాన్ని అక్రమ సంబంధంగా భావించదని సుప్రీం కోర్టు సోమవారం స్పష్టంచేసింది. అలాంటి జంటకు పుట్టిన సంతానానికి పూర్వీకుల ఆస్తిలో వాటాను నిరాకరించరాదని తేల్చి చెప్పింది. ఈ మేరకు కేరళ హైకోర్టు ఇచ్చిన తీర్పును కొట్టేసింది.

ఈ కేసులో ఒక జంట దీర్ఘకాలంగా సహజీవనం చేసింది. వారికి ఓ కుమారుడు జన్మించాడు. అయితే ఈ జంట పెళ్లి చేసుకున్నట్లు ఆధారాలు లేకపోవడం వల్ల.. వారికి పుట్టిన ‘అక్రమ’ సంతానానికి పూర్వీకుల ఆస్తిలో వాటా దక్కదని కేరళ హైకోర్టు 2009లో తీర్పునిచ్చింది. జస్టిస్‌ ఎస్‌.అబ్దుల్‌ నజీర్‌, జస్టిస్‌ విక్రమ్‌ నాథ్‌తో కూడిన సుప్రీం కోర్టు ధర్మాసనం ఈ వాదనతో విభేదించింది. ‘‘ఒక జంట.. భార్యాభర్తల్లా దీర్ఘకాలం పాటు కలిసి సాగారంటే వారు వివాహం చేసుకున్నట్లుగానే భావించాలి. సాక్ష్యాధారాల చట్టంలోని సెక్షన్‌ 114 ఈ మేరకు సూచిస్తోంది. వారు పెళ్లి చేసుకోలేదని విస్పష్టంగా రుజువైతే తప్పించే వారి బంధాన్ని ఈ విధంగానే పరిగణించాలి’’ అని పేర్కొంది. దీనిని ఎవరైనా సవాల్‌ చేయవచ్చని తెలిపింది. అయితే వారు వివాహం చేసుకోలేదని రుజువు చేయాల్సిన బాధ్యత.. ఇలా సవాల్‌ చేసినవారిపైనే ఉంటుందని స్పష్టంచేసింది. ఈ కేసులో తుది డిక్రీ జారీ ప్రక్రియను ట్రయల్‌ కోర్టు ఆలస్యం చేయడాన్ని సుప్రీం కోర్టు తప్పుబట్టింది. ఆస్తి పంపకం దావాల్లో ప్రాథమిక డిక్రీ ఇచ్చిన వెంటనే తుది డిక్రీ జారీకి చర్యలు ప్రారంభించాలని దేశంలోని అన్ని కోర్టులను ఆదేశించింది.