Vijayawada: ఆప్యాయత కరవై.. అనంత లోకాలకు!

 పిల్లలకు విషమిచ్చి తానూ ఆత్మహత్య చేసుకున్న వివాహిత

కృష్ణలంక, న్యూస్‌టుడే: ఎన్నో ఆశలతో వైవాహిక జీవితంలోకి అడుగుపెట్టిన ఆమెకు భర్త నుంచి కోరుకున్న ఆప్యాయత దొరకలేదు. ఇద్దరు పిల్లలు పుట్టినా అతడిలో మార్పు రాలేదు. దీన్ని భరించలేక ఆమె గతంలో ఓసారి ఆత్మహత్యకు ప్రయత్నించింది. తృటిలో ప్రాణాపాయం తప్పింది. తీవ్ర మనస్తాపంతో జీవిస్తున్న ఆ మహిళ ఇక తట్టుకోలేక పిల్లలకు విషమిచ్చి తానూ ఆత్మహత్య చేసుకుంది. ఈ సంఘటన విజయవాడలో చోటుచేసుకుంది. పోలీసుల కథనం ప్రకారం.. లారీడ్రైవర్‌గా పనిచేసే చలమలశెట్టి గోపాలకృష్ణకు పాయకాపురానికి చెందిన చందన లక్ష్మి(27)తో 2012లో వివాహమైంది. వారికి నాగమణికంఠ (9), జయహర్ష (7) పిల్లలు. ఈ కుటుంబం కృష్ణలంక గీతానగర్‌ కరకట్ట సమీపంలో నివసిస్తోంది. లారీ డ్రైవర్‌గా పనిచేసే గోపాలకృష్ణ నిరంతరం విధుల్లో ఉండడం, మద్యం తాగడం తప్ప భార్యాపిల్లలను పెద్దగా పట్టించుకునేవాడు కాదు. అతడి ప్రవర్తనతో విసుగు చెందిన చందన లక్ష్మి నాలుగేళ్ల కిందట ఆత్మహత్యకు ప్రయత్నించింది. ఆసుపత్రిలో చేర్చగా ప్రాణాపాయం తప్పింది. భర్త ప్రవర్తనలో మార్పు లేకపోవడంతోపాటు బంధువులనుంచి ఓదార్పు లభించకపోవడంతో ఆమె ఒంటరితనానికి లోనై మనస్తాపం చెందింది. ఈ క్రమంలో బుధవారం ఉదయం పిల్లలతో పుట్టింటికి వెళ్లిన చందన లక్ష్మి మధ్యాహ్నం రెండింటికి ఇంటికి తిరిగొచ్చింది. వెంట తెచ్చుకున్న ద్రాక్షరసంలో మొక్కలకు వాడే గుళికల మందు కలిపి ముందు తాను తాగి పిల్లలతో తాగించింది. రాత్రి పదిన్నరకు ఇంటికి చేరుకున్న భర్త తలుపుకొట్టగా ఎంతసేపటికీ తీయకపోవడంతో అనుమానం వచ్చి చుట్టుపక్కల వారి సాయంతో పగులగొట్టి లోపలకు వెళ్లాడు. మంచంపై భార్యాపిల్లలు నోట్లోంచి నురుగ కారుతున్న స్థితిలో కనిపించడంతో పోలీసులకు సమాచారమిచ్చాడు. వారు వచ్చి పరిశీలించి ముగ్గురూ చనిపోయినట్లు నిర్ధారించారు. చందన లక్ష్మి రాసిన లేఖ, గుళికల మందు ప్యాకెట్‌ను స్వాధీనం చేసుకున్నారు. ముగ్గురివి అనుమానాస్పద మృతిగా కేసు నమోదు చేసినట్లు సీఐ ఎంవీ దుర్గారావు తెలిపారు.