ఈటీవీ భారత్‌ చొరవతో చిన్నారిని ఆదుకున్న ఫేస్‌బుక్‌ మిత్రబృందం

కార్వార, న్యూస్‌టుడే : చిలిపి వ్యాఖ్యలు.. విమర్శలు.. ట్రోలింగులు.. ఫేస్‌బుక్‌లో గ్రూపులంటేనే ముందుగా ఇవి గుర్తుకొస్తాయి. అయితే సేవకు కూడా వెనుకాడబోమని నిరూపిస్తూ ఓ ఫేస్‌బుక్‌ బృందం ముందుకొచ్చింది. కర్ణాటకలోని ఉత్తర కన్నడ జిల్లా అంబర్దా గ్రామానికి చెందిన శైలేష్‌ కృష్ణ (8) మెదడు వాపు జ్వరంతో బాధపడుతున్నాడు. అపస్మారక స్ధితికి చేరుకున్న ఆ చిన్నారిని బతికించుకోవాలని తల్లిదండ్రులు చేయని ప్రయత్నం లేదు. ధార్వాడ, తదితర ప్రాంతాల్లోని ఆసుపత్రుల్లో చూపించారు. ఫలితం లేకపోయింది. ఈ విషయాన్ని తెలుసుకున్న ‘ఈటీవీ భారత్‌’ విస్తృతంగా ప్రసారం చేసింది. దీన్ని చూసిన స్థానిక ‘ఫేస్‌బుక్‌ ఫ్రెండ్‌ సర్కిల్‌ గ్రూపు’ ఆ చిన్నారికి అండగా నిలిచింది. బెళగావిలోని యశ్‌ ఆసుపత్రిలో చేర్పించి చికిత్సను అందజేస్తోంది. శైలేష్‌కు నయమయ్యే వరకూ వైద్య ఖర్చులను తామే భరిస్తామని వారు భరోసా ఇచ్చారు. మరోవైపు ఈ విషయం జిల్లా పాలనాధికారి నితేష్‌ పాటిల్‌ దృష్టికి వెళ్లింది. చిన్నారికి చికిత్స కోసం తమ వంతు సాయం అందిస్తామని ఆయన కూడా హామీ ఇచ్చారు.