హైదరాబాద్‌ మట్టిగాజులకు భౌగోళిక గుర్తింపునివ్వాలి

 తెలంగాణ పరిశ్రమల శాఖ అధికారుల దరఖాస్తు

ఈనాడు, హైదరాబాద్‌: హైదరాబాద్‌ లాడ్‌బజార్‌లో తయారయ్యే మట్టిగాజులకు భౌగోళిక గుర్తింపునకు రాష్ట్ర ప్రభుత్వం ప్రయత్నాలు చేస్తోంది. రాష్ట్ర పరిశ్రమలు, ఐటీశాఖల నోడల్‌ అధికారిణి శ్రీహారెడ్డి, ఉప సంచాలకుడు సుదిన్‌పాల్‌, జీఐ ఏజెంటు సుభాజిత్‌ సాహాలు ఈ మేరకు గురువారం చెన్నైలోని జీఐ కార్యాలయంలో దరఖాస్తు చేశారు. 500 సంవత్సరాల చరిత్రగల గాజులకు ఎంతో విశిష్టత ఉంది. లక్క రెనిన్‌ను కొలిమిపై కరిగించి, వృత్తాకారంలో తయారుచేసి, వాటికి స్ఫటికాలు, పూసలు లేదా అద్దాలతో డిజైన్‌ చేస్తారు. పూర్తిగా చేతులతో రూపుదిద్దే ఈ గాజులు దేశ, విదేశాల్లో గుర్తింపు పొందాయి. లాడ్‌బజార్‌ గాజులు హైదరాబాద్‌తో పాటు దేశంలోని వివిధ ప్రాంతాల్లో విక్రయిస్తున్నారు. త్వరలోనే జీఐ కార్యాలయ నిపుణుల బృందం హైదరాబాద్‌ను సందర్శించి గాజులను పరిశీలిస్తుంది.

గుర్తింపు ఖాయం

- శ్రీహారెడ్డి, నోడల్‌ అధికారిణి

హైదరాబాద్‌ మట్టిగాజులకు భౌగోళిక గుర్తింపు రావడం ఖాయం. హస్తకళాకారుల ప్రతిభ ప్రపంచానికి తెలియడంతో పాటు వారి ఉత్పత్తులకు మంచి ప్రచారం, మార్కెటింగుకు, కష్టానికి తగ్గ ఫలితం రావడానికి  ఇది ఉపయుక్తమవుతుంది. ఈ ఉద్దేశంతోనే మంత్రి కేటీ రామారావు సూచన మేరకు జీఐ గుర్తింపునకు దరఖాస్తు చేశాం. దశలవారీ పరిశీలన అనంతరం ఆమోదం లభించే వీలుంది.